აზერბაიჯანელი ჟურნალისტის, აფგან მუხტარლის გატაცების ფაქტს ორგანიზაცია „რეპორტიორები საზღვრებს გარეშეც“ ეხმაურება. საგანგებო განცხადება ევროპისა და ცენტრალური აზიის განყოფილების ხელმძღვანელმა იოჰან ბასმა გააკეთა. „ქართულმა მხარემ დაუყოვნებლივ უნდა გააკეთოს განმარტება, თუ რა მოხდა რეალურად, როგორ აღმოჩნდა ჯურნალისტი აზერბაიჯანის ტერიტორიაზე, ის აზერბაიჯანელმა სამართალდამცავებმა გაიტაცეს თუ საქმეში ქართული სპეცსამსახურებიც იყვნენ ჩართულნი. ასევე მოვუწოდებთ აზერბაიჯანულ მხარეს, დაუყოვლებლივ გაათავისუფლოს უკანონოდ დაკავებული ჟურნალისტი. დამოუკიდებელი ჟურნალისტებისთვის ყალბი ბრალდებების წაყენება ალიევის რეჟიმის ხელწერაა. დადგა დრო, ამას წინააღმდეგობა გავუწიოთ,“-ნათქვამია განცხადებაში.
