"საქართველო ერთ-ერთი უმთავრესი პარტნიორია ნატოსთვის",- განაცხადა "ნატოს" გენერალურმა მდივანმა, იენს სტოლტენბერგმა ჟურნალისტებთან საუბარში.
„ველი, რომ ხვალ ჩვენი მოკავშირეები ხაზს გაუსვამენ, რამდენად მნიშვნელოვანია თანამშრომლობა ჩვენს პარტნიორებთან, მათ შორის საქართველოსთან. საქართველო ერთ-ერთი უმთავრესი პარტნიორია ნატოსთვის. ვახორციელებთ არსებით პაკეტს, გავხსენით სასწავლო ცენტრი, ვატარებთ ერთობლივ სწავლებებს - ეს მეტყველებს რამდენად ინტენსიურია ჩვენი კონტაქტი და დიალოგი საქართველოსთან. რაც შეეხება ღია კარის პოლიტიკას, ყველა გადაწყვეტილება, რაც მივიღეთ, ძალაშია. ამას ეს შეხვედრაც ადასტურებს. ხვალ შემოგვიერთდება მონტენეგროსპრემიერმინისტრი. ყველა წევრი ქვეყნის პარლამენტებმა უკვე მოახდინა მონტენეგროს ნატოში მიღების ხელშეკრულების რატიფიცირება. საქართველოსთან კი ვმუშაობთ და ვეხმარებით რეფორმების გატარებაში,” - განაცხადა სტოლტენბერგმა.
ბრიუსელში "ნატოს" ალიანსის ახალ შტაბ ბინაში ხვალ სამიტი გაიმართება. განხილვის მთავარი თემები საერთაშორისო ტერორიზმთან ბრძოლა და ალიანსის ბიუჯეტი იქნება.