დღეს, საგრეო საქმეთა სამინისტროში გამართულ ბრიფინგზე, ავსტრიის საგარეო საქმეთა მინისტრმა მიხეილ შპინდელეგერმა საქართველოსა და ავსტრიას შორის ბიზნესის განვითარების, კულტურული და სამეცნიერო ურთიერთობების გამყარების შესაძლებლობებზე ისაუბრა. მისი თქმით, ამ თემაზე იგი უკვე ესაუბრა საქართველოს საგარეო საქმეთა მინისტრ გრიგოლ ვაშაძეს და გარკვეულ საკითხებზე შეთანხმებაც მოხერხდა, რისი პირველი ნაბიჯიც ავსტრიულ-ქართული ბიზნესასოციაცია იქნება, რომელიც ფუნქციონირებას ამა წლის ივლისიდან დაიწყებს.
"თბილისში ჩამოსულია 40 ავსტრიელი ბიზნესმენი, რომელებსაც სურთ თანამშრომლობა ქართველ ბიზნესმენებთან. ჩვენ დავესწრებით ბიზნესფორუმს და მინდა გითხრათ, რომ ძალიან დიდია ბიზნესინტერესი საქართველოს მიმართ, რასაც აღნიშნული ბიზნესმენების საქართველოში ჩამოსვლაც მოწმობს", - განაცხადა ავსტრიის საგარეო საქმეთა მინისტრმა.
მანვე, საქართველოსა და ავსტრიას შორის კულტურულ და სამცნიერო სფეროებში თანამშორმლობის პერსპექტივებზეც ისაუბრა და აღნიშნა, რომ ეს ორივე ქვეყნის ინტერესში შედის და ორივესთვის მომგებიანი იქნება.
"თანამშრომლობა უნდა გაღრმავდეს კულტურის სფეროშიც. ვფიქრობ, კულტურასა და მეცნიერებაში საქართველოსა და ავსტრიას შორის თანამშრომლობა ორივე ქვეყნისთვის მომგებიანი იქნება", - განაცხადა შპინდელეგერმა.
