„ყოფილი თანამდებობის პირები ისეთ რაღაცებზე საუბრობდნენ, მეგონა, საერთოდ სხვა კონსტიტუცია დავწერეთ. აბსოლუტურად აცდენილი იყო მათი საუბარი ყველაფერს“,- განაცხადა პარლამენტის თავმჯდომარემ საკონსტიტუციო ცვლილებების განხილვაზე. მან გუშინ პრეზიდენტის რეზიდენციაში გამართული შეხვედრა შეაფასა და აღნიშნა, რომ იქ შეკრებილნი რეალობას აცდენილ ინფორმაციას აჟღერებდნენ.
"გუშინ გაიმართა პრეზიდენტის ადმინისტრაციაში შეხვედრა. შეხვედრაზე კონკრეტული ადამიანები გამოდიოდნენ, მათ შორის ყოფილი თანამდებობის პირები და ისეთ რაღაცებზე საუბრობდნენ, მეგონა, საერთოდ სხვა კონსტიტუცია დავწერეთ. აბსოლუტურად აცდენილი იყო მათი საუბარი ყველაფერს. საუბარი იყო ახალი მხედრიონის შექმნაზე. ანუ, იქ ჩაიწერა ასეთი რაღაც რომ „სამხედრო და სხვა შეიარაღებული ძალები“ - რაც არის ტერმინოლოგიური დაზუსტება. ქვეყანას ჰყავს სამხედრო ძალები, ეს არის თავდაცვის სამინისტროს შემადგენლობა და ქვეყანას ჰყავს ასევე სხვა შეიარაღებული ძალები. ეს არის საპოლიციო უწყებები, ეს არის მაგალითად უსაფრთხოების სამსახურის შეიარაღებული ნაწილი, სასჯელაღსრულებას აქვს თავისი შეიარაღებული ნაწილი - ამაზეა საუბარი და ეს გადათარგმნეს, როგორც მხედრიონის შექმნის მცდელობა. თან საუბარია ყოფილ უმაღლეს თანამდებობის პირებზე და არ შეიძლება, ამას რეაქციით არ შეხვდე. არ მინდა, დეტალებში შევიდე, გუშინ იყო განცხადებები, რომელიც აბსოლუტურად აცდენილი იყო ყველას და ყველაფერს", - განაცხადა ირაკლი კობახიძემ.