საქართველოს საგარეო საქმეთა მინისტრის გრიგოლ ვაშაძის ინფორმაციით, აშშ-ის პრეზიდენტი რუს კოლეგა, დიმიტრი მედვედევთან შეხვედრისას საქართველოს საკითხს აუცილებლად დააყენებს. ამის შესახებ ვაშაძე დღეს, საგარეო საქმეთა სამინისტროში, ავსტრიის საგარეო საქმეთა მინისტრთან ერთობლივად ჩატარებული პრესკონფერენციის დროს განაცხადა.
"აშშ რუსეთთან საუბრის დროს საქართველოს საკითხს აყენებდა, აყენებს და ყოველთვის დააყენებს. ჩვენი პარტნიორები აშშ-ში და ევროპაში მოწადინებულები არიან, რომ საქართველოს ტერიტორიული მთლიანობის საკითხი გადაწყდეს. დარწმუნებული ვარ, რომ ობამა მედვედევის შეხვედრის დასრულების შემდეგ გამართულ პრესკონფერენციაზეც იქნებ იმ ფაქტის კონსტანტირება, რომ აშშ-ს სურს, რუსები გავიდნენ საქართველოს ტერიტორიიდან. აშშ და ევროსაბჭო ისახავენ მიზანს, რომ საქართველოს ტერიტორიის 20%-ის ოკუპაცია შეწყდეს. რა თქმა უნდა, ეს ჯადოსნური ჯოხის აქნევით ვერ მოხდება, თუმცა ის რომ, დასავლეთში, ჩვენი კოლეგები ამ პრობლემის გადაწყვეტას ცდილობენ, მისასალმებელია", - განაცხადა ვაშაძემ.
შეგახსენებთ, რომ დღეს, ვაშინგტონში, ამერიკის შეერთებული შტატების პრეზიდენტ ბარაკ ობამასა და რუსეთის ფედერაციის პრეზიდენტ დიმიტრი მედვედევის შეხვედრა გაიმართება.
წინასწარი ინფორმაციით, შეხვედრაზე ორი ქვეყნის პრეზიდენტი ირანისთვის დაწესებულ სანქციებზე და შვილად აყვანის შესახებ მოსამზადებელ ხელშეკრულებაზე იმსჯელებენ.
როგორც თეთრი სახლის ადმინისტრაციაში აცხადებენ, შეხვედრაზე განსახილველ საკითხებს შორის ერთ-ერთი მთავარ საკითხი საქართველოს ოკუპირებული ტერიტორიები იქნება.
