საქართველოს საგარეო საქმეთა მინისტრმა, გრიგოლ ვაშაძემ რუსეთის ფედერაციის პრეზიდენტის, დიმიტრი მედვედევის განცხადებაზე კომენტარი გააკეთა. მისი თქმით, ის რომ რუსეთ-საქართველოს ურთიერთობები გაყინულია, მხოლოდ იმის ბრალი არ არის, რომ მოსკოვს საქართველოს დღევანდელი ხელისუფლება არ მოსწონს.
"მოყოლებული 1991 წლიდან საქართველოში რუსეთისთვის მისაღები ხელისუფლება ვერ მოიძებნა და ვერც მოიძებნება, "რადგან რუსეთს შეუსაბამობა აქვს არა კონკრეტულად ხელისუფლებასთან, არამედ საქართველოსთვის მნიშვნელოვან სამ ფუნდამენტურ საკითხთან - ქვეყნის დამოუკიდებლობასთან, ტერიტორიულ მთლიანობასთან და სუვერენიტეტთან", _ განაცხადა ვაშაძემ დღეს, საგარეო საქმეთა სამინისტროში ავსტრიის საგარეო საქმეთა მინისტრთან ერთობლივად გამართულ პრესკონფერენციაზე.
მისივე თქმით, რუსეთ-საქართველოს ურთიერთოებების ნორმალიზაცია, მხოლოდ მას შემდეგ მოხდება, რაც რუსეთი საქართველოს ისე დაელაპარაკება, როგორც თანაბარუფლებიან, სუვერენიტეტულ სახელმწიფოს.
შეგახსენებთ, რომ რუსეთის პრეზიდენტმა დიმიტრი მედვედევმა აშშ-ში განაცხადა, რომ მოსკოვსა და თბილისს შორის ურთიერთობების გაუმჯობესება მხოლოდ საქართველოს ხელისუფლების შეცვლის შემდეგ იქნება შესაძლებელი.
"როგორც კი საქართველოს ახალი ხელმძღვანელი ეყოლება დარწმუნებული ვარ მოსკოვსა და თბილისს შორის ურთიერთობების გაუმჯობესების საშუალება იქნება", _ განაცხადა მედვედევმა აშშ საზოგადოებრივი და საქმიანი წრეების წარმომადგენლებთან შეხვედრაზე.
