საკონსტიტუციო პროექტის საყოველთაო-სახალხო განხილვაზე “ევროპული საქართველოს” წევრმა ირმა ნადირაშვილმა პრეზიდენტის არჩევის წესის ცვლილებაზე ისაუბრა. მისი თქმით, აღნიშნული ცვლილებები ამჟამინდელი პრეზიდენტის მოქმებებებმა გამოიწვია, ცვლილებები კი ერთგვარი პრევენცია იქნება, რომ მომავალში მორჩილი პრეზიდენტი ჰყავდეს მმართველ გუნდს.
„ეს ამხელა ცვლილებები გამოიწვია ერთმა ადამიანმა, ეს ადამიანი არის გიორგი მარგველაშვილი, რომელიც თავის დროზე ქართულმა ოცნებამ დაასახელა თავის კანდიდატურად, აირჩია, შემდეგ ჩვენ გავიგეთ, რომ მას აღმოაჩნდა განსხვავებული ხასიათი, არა ისეთი, როგორსაც ელოდებოდა ქართული ოცნება და ახლა როდესაც თვლის, რომ 300-მა ხმოსანმა უნდა აირჩიოს პრეზიდენტი, თავს იცავს, რომ სამომავლოდ მსგავსი ტიპის შეცდომები აღარ იყოს დაშვებული და, თუ მაინც ისევ მოხდება პრეზიდენტის არჩევა, რომელიც გამოავლენს თავის ხასიათს, ის ისეთივე ადვილი გადასარჩევი იყოს, როგორც აირჩიეს ,“ - განაცხადა ირმა ნადირაშვილმა.
მის ამ გამოსვლას “ქართული ოცნების წევრმა, გედევან ფოფხაძემ უპასუხა: „დღესაც რომ არანაირი უფლება არ აქვს პრეზიდენტს, ეს ჩვენი ბრალია? ჩვენ შევქმენით ასეთ მოდელი? ჩვენ ხომ ვიცით, 2012 წელს რეალურად რა ხდებოდა, კონსტიტუცია მართლა მოერგო ერთ ადამიანის ინტერესებს, როდესაც მეტჯერ აღარ აირჩევდნენ მოქმედი კონსტიტუციით და მას უნდოდა პრეზიდენტის ინსტიტუტიდან გადაბარგებულიყო პრემიერის ინსტიტუტზე. ეს იყო ერთ ადამიანზე მორგებული კონსტიტუცია,“ - განაცხადა გედევან ფოფხაძემ.
