"არც ერთი სკოლაში ოპტიმიზაცია და გაერთიანება არ იგეგმება," - ამის შესახებ ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ 162-ე სკოლაში მიმდინარე მოვლენების კომენტირებისას მთავრობის სხდომის შემდეგ განაცხადა.
მინისტრმა აღნიშნა, რომ სკოლებს შორის გაფორმებული მემორანდუმი ოპტიმიზაციას არ ნიშნავს.
"განათლების სამინისტროს მთავარი მიზანია, სკოლებმა ერთმანეთს გამოცდილება გაუზიარონ. ჩვენ ბევრი შეხვედრა გვქონდა პედაგოგებთან. იყო დეტალური საუბარი ამ მემორანდუმთან დაკავშირებით. ჩვენი მიზანია, რომ სკოლებმა ერთმანეთს გაუზიარონ გამოცდილება და სიახლეები. რაც შეეხება შიშებს, რომ შესაძლოა, გაერთიანდნენ სკოლები ან ოპტიმიზაცია მოხდეს, ეს არასწორო შიშებია. მესმის, რომ შესაძლოა, წინა წლების გავლენის შედეგად აქვთ ეს შიშები, მაგრამ მსგავსი არაფერი იგეგმება. უფრო მეტიც - ამ პროცესში კერძო სკოლებსაც ჩავრთავთ",-დასძინა განათლების მინისტრმა.
დღეს, თბილისის N162-ე საჯარო სკოლაში სასწავლო პროცესი ჩაიშალა. პედაგოგები პროტესტის ნიშნად, გაკვეთილებზე არ შევიდნენ. მასწავლებლებისთვის მიუღებელი განათლების სამინისტროს ის გადაწყვეტილება აღმოჩნდა, რომლის მიხედვითაც, N162-ე და პირველი ექსპერიმენტული სკოლის ოპტიმიზაცია უნდა მოხდეს.
162-ე სკოლის დირექტორმა მემორანდუმს ხელი უკვე მოაწერა. პედაგოგების თქმით, ეს გადაწყვეტილება მან მშობლებთან და პედაგოგებთან შეთანხმების გარეშე მიიღო.
პედაგოგების პროტესტს მშობლებიც შეუერთდნენ. მათი აზრით, სამინისტროს გადაწყვეტილება და დირექტორის მიერ აღნიშნულ მემორანდუმზე ხელის მოწერა 162-ე სკოლის დახურვას გამოიწვევს.
