„საპროტესტო აქციებიც შესაძლებელია, თუკი ზოგიერთი საკითხი პარლამენტის კედლებში ვერ გადაწყდება“,-განაცხადა „ევროპული საქართველოს“ წევრმა, ლაშა დამენიამ „ჯი-ეიჩ-ენთან“ საუბარში.
მან პარლამენტის ვიცე-სპიკერის, ირმა ინაშვილის განცხადება შეაფასა. „პატრიოტთა ალიანსის“ ლიდერის თქმით, თუკი საკონსტიტუციო ცვლილებების შესახებ ხელისუფლებასთან შეთანხმება ვერ მოხდება, ეს მოვლენები ქვეყანაში დესტაბილიზაციას გამოიწვევს და პარტიებს ქუჩაში მოუწევთ მათი პოზიციის დაცვა.
„ყველა პარტიას მისი მიმართულება აქვს და საპროტესტო აქციებიც შესაძლებელია, თუკი ზოგიერთი საკითხი პარლამენტის კედლებში ვერ გადაწყდება, პარტიებმა შეიძლება სხვაგვარად გამოხატონ მათი პოზიცია“,- განაცხადა ლაშა დამენიამ.
როგორც მან აღნიშნა, „ევროპული საქართველო“ ცდილობს პროცესების სტაბილურ ფორმაში წარმართვას და პლებისციტის საშუალებით ხელისუფლებაზე ზეწოლის მოხდენას, მათ საამისოდ უკვე დაიწყეს ხელმოწერების შეგროვება.
„რაც შეეხება საკონსტიტუციო ცვლილებებს, უტოპიურია „ქართულ ოცნების“ დაგეგმილი ვარიანტი. მათი სურვილით, გამარჯვებულ პარტიას ყველაფერი თან მიაქვს. მომავალში მათ ადგილას შეიძლება იყოს „ევროპული საქართველო“, თავად „ოცნება“ ან სხვა, მაგრამ თავად პრინციპი არის არასწორი. სწორედ ამ მდგომარეობიდან გამომდინარე, ჩვენი პარტია ცდილობს ესაუბროს ხალხს და პლებისციტიდნ გამომდინარე მოსახლეობამ გამოხატოს საკუთარი შეხედულება. მხოლოდ ამას შეუძლია ხელისუფლებისთვის აზრის შეცვლა“-განაცხადა ლაშა დამენიამ „ჯი-ეიჩ-ენთან“.
