პროკურორის მოადგილე გიორგი გოგაძე სახალხო დამცველს მიკერძოებულ მხარეს უწოდებს და აცხადებს, რომ უჩა ნანუაშვიოლმა ყველანაირ ზღვარს გადააბიჯა. ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე შესვლამდე მან ჟურნალისტებთან აღნიშნა, რომ ომბუდსმენის რეკომენდაციების აბსოლუტური უმრავლესობა, სამწუხაროდ, ძალიან შორს არის ობიექტურობისაგან.
,,ვერ გავიზიარებთ. დღევანდელი სხდომა არის ღია, გადაიცემა ტელევიზიით და ყველა ამ საკითხთან დაკავშირებით დეტალურად ვუპასუხებთ",- განაცხადა გოგაძემ.
პროკურორის მოადგილე ასევე გამოეხმარა ე.წ. ციანიდის საქმეზე სახალხო დამცველის პოზიციას, რომ არ არის დაცული მხარეთა თანასწორობა, ვინაიდან დაცვის მხარეს ხელი აქვს მოწერილი გაუთქმელობის პირობაზე. მისი თქმით, ომბუდსმენს ვერც ამ საკითხში დაეთანხმება.
,,სამწუხაროდ, სახალხო დამცველმა ყველანაირ ზღვარს გადააბიჯა ამ მიმართულებით და ის გვევლინება მიკერძოებულად და მხარედ, განსაკუთრებით მაშინ, როდესაც კომენტარებს აკეთებს იმ ფონზე, როდესაც არანაირი ინფორმაცია არც კი ჰქონდა გამოთხოვილი პროკურატურისგან და არც კი აინტერესებდა", - განაცხადა გოგაძემ.
კომიტეტზე სახალხო დამცველის ანგარიშს განიხილავენ, რომელიც სხვადასხვა უწყების, მათ შორის, პროკურატურის მიმართ რეკომენდაციებს შეიცავს.