ასეთი საკონსტიტუციო ცვლილებები პოლიტიკურ კლასს მხოლოდ რევოლუციის გზას უტოვებს,- განაცხადა პარლამენტის ვიცე-სპიკერმა ირმა ინაშვილმა.
ინაშვილის თქმით, „პატრიოტთა ალიანსი“ არ იზიარებს პროექტში ჩაწერილ მთელ რიგ ცვლილებებს და ამიტომ დატოვეს კომისია.
"პირველ რიგში, ეს საარჩევნო სისტემას უკავშირდება. ჩვენთვის მიუღებელია ხმების გადანაწილების ის პრინციპი, რაც ასახულია პროექტში. ეს ძალიან ავტორიტარული მიდგომაა, ქვეყანაში პოლიტიკურ კლასს მარხავს და ქვეყნის სტაბილურობას საფრთხეს უქმნის. პოლიტიკურ კლასს ერთადერთ გზას - რევოლუციის გზას უტოვებს, რომლის მომხრე არ ვართ. ამიტომ ვეცდებით, ხელისუფლება დავარწმუნოთ იმაში, რომ აუცილებელია, ე.წ. ბონუსების ის ცვლილება შეიცვალოს, რაც პროექტშია წარმოდგენილი. ხელისუფლებას მივმართავ, ჩვენ არ გვინდა მტრობა და ისე ნუ გავაკეთებთ, რომ უკან დასახევი გზა აღარ დაგვრჩეს", - განაცხადა საზოგადოებრივთან ინაშვილმა.