თუ ჩამომითვლით საქართველოში 10 კვალიფიციურ პარტიას, მაშინ მე ვიქნები მომხრე ბლოკის ინსტიტუტის დატოვების, – ამის შესახებ საქართველოს პარლამენტის თავმჯდომარემ საარჩევნო სისტემის ახალ მოდელთან დაკავშირებით გამოთქმული კრიტიკის საპასუხოდ განაცხადა.
მისი თქმით, ,,სიმახინჯეა, რომ საქართველოში არსებობს 20 ე.წ. კვალიფიციური პარტია და ვიდრე ბლოკები იქნება, ეს სიმახინჯე დარჩება ჩვენს პოლიტიკურ სისტემაში”.
„თუ თქვენ ჩამომითვლით საქართველოში 10 პარტიას (კვალიფიციურზე აღარ ვსაუბრობ), მაშინ მე ვიქნები პირველი მომხრე ბლოკის ინსტიტუტის დატოვების, მაგრამ ვერ ჩამომითვლით. ეს არის სიმახინჯე, რომ საქართველოში არსებობს 20 ე.წ. კვალიფიციური პარტია და ვიდრე ბლოკები იქნება, ეს სიმახინჯე დარჩება ჩვენ პოლიტიკურ სისტემაში. 5%-იანი ბარიერი არის უპირობოდ მნიშვნელოვანი, რომ საქართველოში ჩამოყალიბდეს სტაბილური საპარლამენტო სისტემა და რაც შეეხება ე.წ. ბონუსს, ანუ გაუნაწილებელი მანდატების განაწილებას, ამასაც აქვს გადამწყვეტი მნიშვნელობა იმისთვის, რომ საქართველოში გაგრძელდეს სტაბილური განვითარება დემოკრატიული პროცესების. ჩვენ ვცვლით არა ერთ სისტემას უკეთესით, არამედ შემოგვაქვს კარგი ოპტიმალური სისტემა საქართველოსთვის. როცა საქმე ეხება ამას, აქ, ბუნებრივია, კომპრომისზე საუბარი ზედმეტია. ჩვენ ვერ წავალთ კომპრომისზე ჩვენი ქვეყნის ინტერესების წინაშე“, – განაცხადა ირაკლი კობახიძემ.