თინა ხიდაშელს აქვს საინტერესო გეგმები, რითიც ძალიან ბედნიერები არიან ჩვენი ბავშვები, - განაცხადა პარლამენტის ყოფილმა თავმჯდომარემ დავით უსუფაშვილმა, რომელმაც დღეს პოლიტიკაში დაბრუნება დააანონსა.
"როდესაც 2005 წელს გადავწყვიტე აქტიურ პოლიტიკაში ჩართვა, გვქონდა ასეთი ოჯახური შეთანხმება - მე წავიდოდი ამ უმადურ, უხელფასო და უყველაფრო საქმეში და თინა მიხედავდა ოჯახს, იშრომებდა, ოჯახში შემოიტანდა, როგორც იტყვიან. დაახლოებით ორი კვირის თავზე მივდივარ ოფისში და მაჩვენებენ თინას განცხადებას, რომ შემოვიდა პარტიაში. მაშინდელი ლიდერი მორიგმა რაღაცამ იმდენად გადარია, რომ ჩემთან დაარღვია პირობა და შემოვიდა პარტიაში. ამჯერად არ ველოდები ასეთ მოქმედებას. მას აქვს საინტერესო გეგმები პროფესიული, საექსპერტო მიმართულებით უსაფრთხოების საკითხებში. ასე რომ, მის პოლიტიკურ გააქტიურებას არ ველოდი, არ არის დაგეგმილი. ოდესმე არ გამოვრიცხავ, მაგრამ უახლოეს თვეებში თუ წლებში ეს ასე არ იქნება, რითიც ძალიან ბედნიერები არიან ჩვენი ბავშვები",- განაცხადა უსუფაშვილმა.
პარლამენტის ყოფილი თავმჯდომარე და რესპუბლიკელების ყოფილი ლიდერი პოლიტიკაში ბრუნდება და ხელისუფლებას 3-პუნქტიან გეგმას სთავაზობს.
