"ძველ საგადასახადო კოდექსში მრავლად იყო ხისტი მიდგომები და ამიტომ სხვა გზით წავედით", - ამის შესახებ განცხადება საფინანსო საბიჯეტო კომიტეტის სხდომაზე ახალი საგადასახადო კოდექსის განხილვისას ფინანსთა მინისტრმა კახა ბაინდურაშვილმა განაცხადა. მისი განცხადებით, სახელმწიფოს ამოცანა არ ყოფილა მაქსიმალური შემოსავალი მიეღო, მისი მიზანი ბიზნესის ლეგალიზაცია და საგადასახადო ტვირთის შემსუბუქებაა.
"ქვეყანას დეფიციტი აქვს, რაც გლობალური ეკონომიკური კრიზისის კვალია და დღეს საშუალება არ გვაქვს, გადასახადები შევამციროთ. თუმცა 2013 წლამდე გადასახადები აუცილებლად შემცირდება. ჯერ კიდევ მერობის კანდიდარტი გიგი უგულავა მეწარმეებს გარკვეულ შეღავათებს დაჰპირდა და ჩვენ ახლა ამ დანაპირებს ვასრულებთ. თუმცაღა ფისკალურ ეფექტს ველით ალკოჰოლური სასმელების დაბეგვრიდან, რადგანაც აქციზის გადამხდელთა ბაზა ფართოვდება. შესაძლებელია, სამომავლოდ სპირტიანი სასმელების პროდუქცია გაძვირდეს, მაგრამ ეს იქნება უმნიშვნელო გაძვირება. ვთქვათ, დღეს თუ არაყი საშუალოდ 15 ლარი ღირს, აქციზის გაძვირების გამო მისმა ფასმა შესაძლოა 50 თეთრით მოიმატოს. იმავდროულად, აქციზის გადასახადი იზრდება კომუნიკაციურ სფეროზე, რადგან მათ აქვთ დაბალი საგადასახადო წნეხი", - განაცხადა ბაინდურაშვილმა.
შეგახსენებთ, რომ ახალი საგადასახადო კოდექსი პრემიერ-მინისტრმა ნიკოლოზ გილაურმა 3 ივნისს გააცნო და მას შემდეგ ნებისმიერ მსურველს სპეციალური საიტისა და ცხელი ხაზის საშუალებით შესაძლებლობა ჰქონდა საკუთარი შენიშვნები მიეწოდებინა პრემიერ-მინისტრისთვის.
