პარლამენტის თავმჯდომარის მოადგილე ანზორ ბოლქვაძე აჭარის მაღალმთიანეთში არსებული კურორტ ბეშუმის საზაფხულო სეზონისთვის მზადებით დაინტერესდა. მიმდინარე წელს ხელისუფლებამ კურორტის ინფრასტრუქტურის მოსაწესრიგებლად მნიშვნელოვანი ღონისძიებები გაატარა. მოწესრიგდა შიდა გზები და წყალმომარაგება. ამჟამად ადგილობრივი ინვესტორების ძალისხმევით მიმდინარეობს ძველი კოტეჯების რემონტი. ასევე, შენდება 100 ახალი კოტეჯიც.
"5 ივლისისთვის კურორტი დამსვენებლების მისაღებად მზად იქნება. მანამდე დასრულდება ელექტრომომარაგების სისტემის აღდგენაც. მოკლედ, დამსვენებლებისა და ადგილობრივებისთვის ღირსეული პირობების შესაქმნელად ბევრი რამ გაკეთდა. რამდენიმე წელია, კურორტ ბეშუმის პოპულარობა სულ უფრო და უფრო იზრდება. აქაური ჰავა და ბუნება უნიკალურია. ძლიერ იმატა სტუმრების რიცხვმა დედაქალაქიდან და საქართველოს სხვადასხვა კუთხიდან. ეს არის იაფი და სასიამოვნო დასვენების კერა, რაც ძალიან მნიშვნელოვანია, როგორც ვიზიტორთათვის, ასევე ადგილობრივებისთვის", - ამბობს ბოქვაძე.