ბოლო დღეების განმავლობაში განსაკუთრებით დამძიმებულია კონფრონტაცია ამერიკის შეერთებულ შტატებსა და ჩრდილოეთ კორეას შორის. მედიაში გავრცელებული ინფორმაციით, ჩრდილოეთ კორეა ბირთვული ბომბის გამოცდას აპირებს, რასაც ეწინააღმდეგება აშშ, სამხრეთ კორეასა და იაპონიასთან ერთად. მათი თქმით, შესაძლოა კიმ ჩენ ინის რეჟიმს პრევენციული დარტყმა მიაყენონ, რათა ხელი შეუშალონ ბომბის გამოცდას.
განვითარებული მოვნელების შესახებ „ჯი-ეიჩ-ენი“ ექსპერტ გია ხუხაშვილს ესაუბრა:
„მე არამგონია ამერიკელები იმდენად ბრიყვები იყვნენ, რომ ვერ ხვდებოდნენ თუ რამდენად უაზროა ჩრდილოეთ კორეელების გაფრთხილება. რადგან მაგ ქვეყნის რეჟიმი ზუსტადაც რომ კონფრონტაციის ტალღაზე დგას და ამ შემთხვევაში უფრო მეტ კონსოლიდაციას განიცდის, იმის მაგივრად, რომ შეუშინდეს ამ სიტუაციას. ამიტომ, მე მაინც ვფიქრობ რომ შეერთებული შტატების გააქტიურება მიზნად ისახავს შიდა პოლიტიკის გადაწყვეტას, სირიის პროცესებში დაბრუნებას და მსოფლიო ლიდერობის შეხსენებას, მათ შორის სამხედრო საკითხებში.
ახალ ესკალაციასთან დაკავშირებით რისკები არის ძალიან მაღალი, მაგრამ მე მაინც ვფიქრობ რომ რაღაც დრამატული სცენარები არ განვითარდება. ზოგადად დასავლეთსა და ჩრდილოეთ კორეას შორის დაძაბულობა მუდმივად არის მეტ-ნაკლები ინტენსიურობით და მე მაინც ვფიქრობ, რომ რაღაც შეუქცევადი პროცესი არ დაიწყება. თავად ბომბის გამოცდას ჩაატარებენ თუ არა ჯერ კიდევ უნდა ვნახოთ, რადგან პრესაში იწერებოდა, რომ ისინი აპირებდნენ გამოცდას, რეალურად კი ჩრდილოეთ კორეის მხრიდან ამის დადასტურება ჯერ არ ყოფილა“,-განაცხადა გია ხუხაშვილმა „ჯი-ეიჩ-ენთან“.
