უსაფრთხოების სამსახური დღეს ყველაზე დიდ საფრთხეს უქმნის საქართველოს მოქალაქეებს, – ამის შესახებ საპარლამენტო უმცირესობის წევრმა სერგო რატიანმა პარლამენტში სახელმწიფო უსაფრთხოების სამსახურის ანგარიშის საკომიტეტო მოსმენის დახურვის შემდეგ ჟურნალისტებს განუცხადა.
მისივე თქმით, საპარლამენტო უმრავლესობა ცდილობს კომფორტი შეუქმნას ამ უწყებას და ამის გამო დახურეს კომიტეტის სხდომა.
”გასაგებია, რომ უსაფრთხოების სამსახური დღეს ყველაზე დიდ საფრთხეს უქმნის საქართველოს მოქალაქეებს. სახალხო დამცველის ანგარიშში ძალიან ბევრი თავია სწორედ ამ მიმართულებით და ამ პრეტენზიებით არის სავსე, დაწყებული უნივერსიტეტში „ოდეერების“ არსებობით და დამთავრებული ბათუმის ინციდენტით. რეალურად მათ უნდათ დაუმალონ უსაფრთხოების სამსახურის უფროსი საზოგადოებას, კითხვები არ იყოს ღია, უნდათ შეუქმნან აღნიშნულ სამსახურს კომფორტი და სწორედ ამის გამო დახურეს სხდომა. გვესმის, რომ არსებობს კითხვები, რომელიც შეიძლება იყოს დახურულ ფორმატში დასასმელი, მაგრამ საზოგადოებას ამ სამსახურის მიმართ აქვს კითხვები, რომელიც უნდა იყოს საჯარო და ეს პრეტენზიები უნდა მოისმინოს ყველამ. დღეს უსაფრთხოების სამსახური უფრო მეტ საფრთხეს უქმნის საქართველოს მოქალაქეებს, არასამთავრობო ორგანიზაციებს, ჟურნალისტებს, პოლიტიკოსებს, ახალგაზრდებს, ვიდრე უქმნის ჩვენი ქვეყნის მტრებს”, – განაცხადა სერგო რატიანმა.
