დღეს, სახელმწიფო საკონსტიტუციო კომისიის სხდომის დაწყებისას, პარლამენტის თავმჯდომარემ და კომისიის ხელმძღვანელმა ირაკლი კობახიძემ განცხადება გააკეთა. მისი თქმით, კომისიას სარწმუნო ინფორმაცია აქვს იმის შესახებ, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს მათ მიერ კომისიის დატოვებასთან დაკავშირებით.
”გვქონდა სარწმუნო ინფორმაცია იმასთან დაკავშირებით, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს, მათ მიერ კომისიის დატოვებასთან დაკავშირებით. სამწუხაროა, რომ ეს სარწმუნო ინფორმაცია მართლდება - რამდენიმე სუბიექტს, ჩვენი ინფორმაციით, დაგეგმილი აქვს შესაბამისი გადაწყვეტილების გახმოვანება, თუმცა ეს ყველაფერი, ბუნებრივია, ხელს ვერ შეუშლის იმ სამუშაოს ბოლომდე მიყვანას, რომელიც ჩვენ დავიწყეთ სახელმწიფო საკონსტიტუციო კომისიაში. ჩვენ აუცილებნლად შევასრულებთ დასახულ მიზანს, რომელიც საქართველოს პარლამენტმა დაგვისახა და საბოლოოდ ძალიან დახვეწილი კონსტიტუცია გვექნება“, - განაცხადა ირაკლი კობახიძემ.
ირაკლი კობახიძემ საკონსტიტუციო კომისიის მუშაობაზე და დაგეგმილ ცვლილებებზე ისაუბრა. მან აღნიშნა, რომ "ძალიან ცუდი კონსტიტუცია იცვლება ძალიან კარგი კონსტიტუციით."
საკონსტიტუციო კომისიის დღევანდელ სხდომაზე სარედაქციო ხასიათის განხილვები სრულდება. ამის შემდეგ კი პროექტის სახელმწიფო საკონსტიტუციო კომისიის სხდომაზე გატანა იქნება შესაძლებელი. კომისიამ კონსტიტუციის სამუშაო ვარიანტი არასამთავრობო ორგანიზაციებს უკვე წარუდგინა. დოკუმენტში წერია, რომ ქორწინება არის ქალისა და კაცის კავშირი ოჯახის შექმნის მიზნით, რომელიც მეუღლეთა უფლებრივ თანასწორობასა და ნებაყოფლობას ემყარება. ასევე წერია, რომ საქართველოს პრეზიდენტს ხუთი წლით დებატების გარეშე, ფარული კენჭისყრით საარჩევნო კოლეგია აირჩევს.
