მგონია, რომ ირაკლი კობახიძის განცხადება არის არაზუსტი და დამაზიანებელი ინფორმაცია პროცესისთვის, - ამის შესახებ ახალგაზრდა იურისტთა ასოციაციის ხელმძღვანელმა ანა ნაცვლიშვილმა პარლამენტის თავმჯდომარის განცხადებაზე კომენტირებისას აღნიშნა, სადაც ირაკლი კობახიძემ თქვა, რომ პრეზიდენტის ადმინისტრაცია პარტიებსა და არასამთავრობო ორგანიზაციებთან მართავდა კონსულტაციებს კომისიის დატოვებასთან დაკავშირებით.
როგორც ანა ნაცვლიშვილმა აღნიშნა, კონსულტაციების შესახებ არაფერი სმენია და არც მსგავს მოლაპარაკებებში მიუღია მონაწილეობა.
„ჩვენთან კონსულტაციები არ ყოფილა და დარწმუნებით შემიძლია ვთქვა, რომ პარტნიორ ორგანიზაციებთან რომ ყოფილიყო აუცილებლად მეცოდინებოდა. მგონია, რომ ეს არის არაზუსტი და დამაზიანებელი ინფორმაცია ზოგადად პროცესისთვის, თუ არასამთავრობო რაიმე ტიპის გადაწყვეტილებას იღებდნენ და მიიღებენ როგორც კონსტიტუციასთან, ასევე სხვა საკითხებთან მიმართებაში, ეს არის არასამთავრობო ორგანიზაციების პოზიცია არ არის საჭირო ვინმესთან მიბმა ჩვენი გადაწყვეტილების მიღების პროცესში“, - განაცხადა ანა ნაცვლიშვილმა.
ირაკლი კობახიძემ აღნიშნა, რომ სარწმუნო ინფორმაცია აქვს, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს მათ მიერ კომისიის დატოვებასთან დაკავშირებით.
”გვქონდა სარწმუნო ინფორმაცია, რომ პრეზიდენტი ცალკეულ პარტიებსა და არასამთავრობო ორგანიზაციებთან მართავდა კონსულტაციებს, მათ მიერ კომისიის დატოვებასთან დაკავშირებით. სამწუხაროა, რომ ეს სარწმუნო ინფორმაცია მართლდება. რამდენიმე სუბიექტს, ჩვენი ინფორმაციით, დაგეგმილი აქვს შესაბამისი გადაწყვეტილების გახმოვანება, თუმცა ეს ყველაფერი, ბუნებრივია, ხელს ვერ შეუშლის იმ სამუშაოს ბოლომდე მიყვანას, რომელიც ჩვენ დავიწყეთ სახელმწიფო საკონსტიტუციო კომისიაში. ჩვენ აუცილებლად შევასრულებთ დასახულ მიზანს, რომელიც საქართველოს პარლამენტმა დაგვისახა და საბოლოოდ შედეგი იქნება ძალიან დახვეწილი კონსტიტუციის შექმნა“, - განაცხადა ირაკლი კობახიძემ.
