სახელმწიფო უსაფრთხოების სამსახურის ხელმძღვანელი, ვახტანგ გომელაური აცხადებს, რომ ფარულ საგამოძიებო მოქმედებებთან დაკავშირებით შექმნილი ახალი სააგენტოს ხელმძღვანელის თანამდებობაზე მისი არცერთი მოადგილის კანდიდატურა არ განიხილება.
„რაც შეეხება კანდიდატურას, ერთს ვიტყვი, რომ ალეკო ტაბატაძე არ არის კანდიდატურა, იმ სიაში არ შედის. სამი კანდიდატი უნდა შევარჩიოთ იცით თქვენ, შემდეგ კომისიამ უნდა გადაწყვიტოს, აარჩიოს იქიდან და შემდეგ წარვუდგენთ პრემიერ-მინისტრს დასამტკიცებლად.
ჯერ ბოლო გადაწყვეტილება არ გვაქვს მიღებული და აქედან გამომდინარე, ვერ დავასახელებ. სამი თვე გვაქვს ვადა, სამი თვის განმავლობაში უნდა მოხდეს დასახელება. მონახაზში არის რამდენიმე ადამიანი, თუმცა ჯერ ვერ დავასახელებ სახელებს და გვარებს. დარწმუნებით შემიძლია გითხრათ, არცერთ ჩემს მოადგილეზე არ არის საუბარი “, - განაცხადა ვახტანგ გომელაურმა.
