,,სამწუხაროდ, ბოლო წლების ქართულ რეალობაში ეს არ არის იშვიათობა, როდესაც ადამიანებს ქუჩაში ესხმიან და დამნაშავეები დაუსჯელები რჩებიან. ჩნდება სერიოზული ეჭვები ხელისუფლების ჩართულობასთან დაკავშირებით’’ - აცხადებს მოძრაობა თავისუფლებისთვის- ევროპული საქართველოს წევრი ირაკლი კიკნაველიძე შს მინისტრის ყოფილ მოადგილეზე თავდასხმასთან დაკავშირებით.
,,მოტივებზე საუბარი ჯერ ძალიან ადრეა. გამოძიება უნდა წარიმართოს და დადგინდეს დამნაშავე. ამ შემთხევაში, მნიშვნელოვანია გამოძიება დასრულდეს სწრაფად, დამნაშავეები დადგინდეს, რომ მომავალში აღარავის გაუჩნდეს ცდუნება რომ ვინმეს თავს დაესხას ქუჩაში, მაგრამ ეს არის ბოლო წლების ქართული რეალობის განუყოფელი ნაწილი, ძალადობა და შემდეგ გამოუძიებლობა ამ ტიპის ძალადობის. ეს ყველაზე მეტად აზიანებს თითოეული მოქალაქის უსაფრთხო გარემოს საქართველოში’’,- განაცხადა ირაკლი კიკნაველიძემ.
დღეს, თბილისის ცენტრში თავს დაესხნენ შინაგან საქმეთა მინისტრის ყოფილ მოადგილეს გელა ხვედელიძეს. გავრცელებული ინფორმაციით, გელა ხვედელიძეს ორი ნიღბიანი პირი საცხოვრებელ სახლთან დაესხა თავს, როდესაც ის მაღაზიაში პროდუქტების საყიდლად მიდიოდა.
არსებული ინფორმაციით, შს მინისტრის ყოფილ მოადგილეს მრავლობითი დაზიანება აქვს მიღებული და გადაყვანილია სამედიცინო დაწესებულებაში.
