ჩვენ მონაწილეობას მივიღებთ განხილვაში, რომელიც პრეზიდენტმა შემოგვთავაზა, - ამის შესახებ ,,ევროპული საქართველოს“ წევრმა, სერგი კაპანაძემ განაცხადა.
,,მიგვაჩნია, რომ საკონსტიტუციო ცვლილებები უნდა იყოს ფართო კონსენსუსის საგანი. საზოგადოების ყველა ფენა და ინსტიტუტი უნდა თანხმდებოდეს ამ ცვლილებებზე. საკონსტიტუციო კომისია, რომელიც პარლამენტში შეიქმნა და სადაც ჩვენც ვმონაწილეობთ, წარმოადგენს ერთ პრობლემას და ეს პრობლემაა ის, რომ იქ პრეზიდენტის ინსტიტუტი არ მონაწილეობს. ეს არის ,,ქართული ოცნების“ ბრალი. აქედან გამომდინარე სავსებით ლოგიკურია, რომ პრეზიდენტს სურს სხვადასხვა პოლიტიკურ პარტიებთან და საზოგადოების წევრებთან ჰქონდეს კონსულტაციები კონსტიტუციაზე“, - განაცხადა სერგი კაპანაძემ.
საქართველოს პრეზიდენტი საკონსტიტუციო ცვლილებებთან დაკავშირებით დღეს საკონსტიტუციო კომისიის წევრებსა და საზოგადოების წარმომადგენლებს შეხვდება.
მმართველი გუნდის წარმომადგენლები პრეზიდენტის სასახლეში ამ შეხვედრაზე მისვლას არ აპირებენ. ამის მიზეზად საპარლამენტო უმრავლესობის წევრები პარლამენტის პლენარულ სხდომას ასახელებენ.
საკონსტიტუციო კომისია, ახალ პროექტზე მუშაობის პროცესში პრეზიდენტის უფლებამოსილებების კორექტირებაზეც მსჯელობს, რაც გიორგი მარგველაშვილმა მისი ფიგურისადმი უმრავლესობის კრიტიკული დამოკიდებულებით ახსნა. პრეზიდენტის შეფასებას პარლამენტის თავმჯდომარემ უპასუხა და აღნიშნა, რომ მარგველაშვილი საკონსტიტუციო კომისიის დისკრედიტაციას ცდილობს.
2016 წლის 12 დეკემბერს, პარლამენტის წინადადებაზე, პრეზიდენტს მონაწილეობა მიეღო საკონსტიტუციო კომისიის მუშაობაში, პრეზიდენტის ადმინისტრაციამ უარი თქვა.