არანაირი სურვილი არ მაქვს და არც საჭიროება არსებობს, რომ საპატრიარქოს ტელევიზიაში დავბრუნდე, - განაცხადა ,,იმედთან“ საუბარში ქართული უნივერსიტეტის სამეთვალყურეო საბჭოს თავმჯდომარე გიორგი ანდრიაძემ.
,,ზოგადად, ჩემს მიერ აწყობილ სტრუქტურებს მე უკან არ ვუბრუნდები ხოლმე. შეთავაზებაც არ არსებობს, მაგრამ ტელევიზიის დირექტორობას არ ვაპირებ, პატრიარქის ერთგული ნებისმიერი სასულიერო პირი შეუძლიათ დანიშნონ. მე არ ვაპირებ დირექტორობას და ეს საპატრიარქოშიც იციან,“- განაცხადა ანდრიაძემ.
საპატრიარქოს ტელევიზიაში დირექტორის თანამდებობა გუშინ მას შემდეგ გახდა ვაკანტური, რაც მეუფე პეტრე სინოდმა ამ პოსტიდან გადააყენა. მოგვიანებით, გავრცელდა ინფორმაცია, რომ მეუფე პეტრე შესაძლოა გიორგი ანდრიაძემ შეცვალოს. გუშინვე, საპატრიარქოს ტელევიზია "ერთსულოვნების" წარმომადგენლებმა საგანგებო ბრიფინგი გამართეს. თანამშრომლების სახელით განცხადება დირექტორის მოადგილემ, დეკანოზ ზურაბ ცხოვრებაძემ გააკეთა. ისინი მეუფეს მხარდაჭერას უცხადებენ.
