საპარლამენტო უმცირესობის წევრი, ირაკლი აბესაძე პრეზიდენტის საკონსტიტუციო უფლება-მოსილების შემცირებას ხელისუფლების მხრიდან სასამართლოზე გავლენის გაძლიერების მცდელობად აფასებს.
,,ძალიან მნიშვნელოვანი ცვლილებები არის წარმოდგენილი სასამართლო ხელისუფლებასთან მიმართებაში. იგეგმება კიდევ ერთხელ საქართველოს პრეზიდენტის კონსტიტუციური უფლებების შეკვეცა და მას როგორც ჩანს, შესაძლებელია ჩამოერთვას საქართველოს პარლამენტისთვის უზენაესი სასამარლოს მოსამართლეობის კანდიდატურების წარდგენის უფლებამოსილება. კანდიდატებს შეარჩევს იუსტიციის საბჭო წარმოდგენილი ალტერნატივით, რაც რა თქმა უნდა მიუღებელია ერთის მხრივ პრეზიდენტის კონსტიტუციური უფლებამოსილების შეკვეცის და შემცირების კუთხით და მეორეს მხრივ ნათელია, რომ კვლავ იქნება გამოყენებული ,,ქართული ოცნების’’ მხრიდან სასამართლოზე პოლიტიკური გავლენის გაძლიერებისთვის. ასევე იცვლება მოსამართლის პირველად გამწესების წესთან მიმართებაში საკონსტიტუციო დანაწესი და ახლა სავალდებულო იქნება მოსამართლეთა სამწლიანი გამოსაცდელი ვადით დანიშვნა იმის ნაცვლად, რომ მივდიოდეთ ამ გამოსაცდელი ვადის გაუქმებისკენ,’’- აცხადებს ირაკლი აბესაძე.
საკონსტიტუციო კომისია დღეიდან მუშაობის ახალ ეტაპზე გადადის. იწყება კონსულტაციების მეორე რაუნდი, რომლის საფუძველზეც ის ძირითადი ცვლილებები უნდა გამოიკვეთოს რომელიც საბოლოოდ კონსტიტუციაში შევა. ოპოზიციის ინფორმაციით, დღესვე საუბარი იქნება პრეზიდენტის უფლებამოსილების შეზღუდვაზე, რომელსაც ისინი კატეგორიულად ეწინააღმდეგებიან.
