საქართველოს და სომხეთის მთავრობებს შორის, აფხაზეთის რკინიგზის აღდგენასთან დაკავშირებით მოლაპარაკებების მიმდინარეობას, ვიცე პრემიერი კახა კალაძე უარყოფს. მისი თქმით, ოპოზიცია ძალიან ბევრ სიცრუეს ამბობს.
„პირველად მესმის, ეს არ არის სწორი ინფორმაცია. მსჯელობაც კი არ ყოფილა მთავრობაში ამ კონკრეტულ პროექტთან დაკავშრებით. ოპოზიცია ბევრ რამეს ამბობს და ძალიან ბევრ სიცრუეს,“ - აცხადებს კახი კალაძე.
,,ერთიანი ნაციონალური მოძრაობა“ მიიჩნევს, რომ იმ შემთხვევაში, თუ აფხაზეთის რკინიგზა გაიხსნება, რისი საფუძვლიანი ეჭვიც არსებობს, ეს გამორიცხავს როგორც საქართველოს ტერიტორიული მთლიანობის აღდგენას, ასევე დევნილების დაბრუნებას და არაღიარების პოლიტიკის შენარჩუნებას. აღნიშნულთან დაკავშირებით დღეს გამართულ ბრიფინგზე პარტიის წარმომადგენელმა ნიკა რურუამ ისაუბრა.
რურუას განცხადებით, საქართველოში სომხეთის პრემიერის ვიზიტის შემდეგ, საფუძვლიანი ეჭვი გაჩნდა, რომ მან და კვირიკაშვილმა აფხაზეთის რკინიგზის აღდგენაზე ისაუბრეს. ეჭვს საფუძვლიანს ხდის აღნიშნულთან დაკავშირებით კარაპეტიანის მკაფიო განცხადებაც, რაც შემდგომ სომხურმა და რუსულმა მედიამაც დაადასტურა და აღნიშნა, რომ ლარსის ალტერნატიული ეკონომიკური გზა გაიხსნება.
