დღეს იგეგმება პოლიტიკური შოუს მოწყობა, მე ამ შოუში მონაწილეობის მიღებას არ ვაპირებ, - ამის შესახებ თბილისის მერმა დავით ნარმანიმ მოსამართლე ნატა ნაზღაიძის ოჯახისთვის თანხის გამოყოფის საკითხზე საკრებულოში მისვლასთან დაკავშირებით განაცხადა. მისივე თქმით, ეს არის პოლიტიკური პროცესი და საკრებულოს უმრავლესობა ოპოზიციას ღირსეულ და საკადრისს პასუხს გასცემს.
”საზოგადოებამ ძალიან კარგად იცის, რომ მე, როგორც დედაქალაქის მერს საკრებულოში ანგარიშის წარდგენის პრობლემა არასდროს არ მაქვს, მათ შორის გასულ წელს ორჯერ რიგგარეშედაც ვიმყოფებოდი საკრებულოში, თუმცა გამომდინარე იქიდან, რომ დღეს იგეგმება პოლიტიკური შოუს მოწყობა, მე ამ შოუში მონაწილეობის მიღებას არ ვაპირებ. ეს არის აბსოლუტურად თითიდან გამოწოვილი საკითხი, რომლის პედალირებასაც სპეციალურად ახდენენ ჩვენი პოლიტიკური ოპონენტები”, - აღნიშნა თბილისის მერმა.
საკრებულოს ოპოზიცია დღეს, 16:00 საათზე დანიშნულ სხდომაზე დავით ნარმანიას მისვლას და მოსამართლე ნატა ნაზღაიძის ოჯახისთვის მილიონიანი ქონების გადაცემის საკითხზე მათთვის ახსნა-განმარტების მიცემას ითხოვს.
