პარლამენტის თავდაცვისა და უსაფრთხოების კომიტეტის თავმჯდომარე აცხადებს, რომ საქართველოს მოქალაქის ტყვეობიდან გასათავისუფლებლად, ყველაფერი გაკეთდება. ირაკლი სესიაშვილის ინფორმაციით, კონგოში, ტყვეობაში მყოფი საქართველოს მოქალაქის მდგომარეობა დამაკმაყოფილებელია.
"მხოლოდ 22 თებერვალს გახდა ცნობილი ჩვენი ხელისუფლებისთვის, საგარეო უწყებისთვის. ამ ამბის შესახებ, სამწუხაროდ, მანამდე ხელისუფლებისთვის არც ოჯახის წევრებს მოუმართავთ, დღესდღეობით საგარეო უწყება მაქსიმალურად არის ჩართული იმისთვის, რომ ჩვენი მოქალაქის გათავისუფლება მოხდეს. ის ამჟამად არ ირიცხება საქართველოს შეიარაღებულ ძალებში. ის ჩვენი მოქალაქეა და იქ, როგორც ჩანს, საკუთარი ნებით არის წასული. ამის მიუხედავად სახელმწიფო ყველაფერს გააკეთებს საკუთარი მოქალაქის გასათავისუფლებლად. სიტუაცია რთულია, თუმცა ყველა საშუალებას ვიყენებთ ჩვენი მოქალაქის გასათავისუფლებლად. ყველასთან გვაქვს კავშირი, რათა ჩვენი მოქალაქე ქვეყანას დაუბრუნდეს. არსებული ინფორმაციით, მისი მდგომარეობა დამაკმაყოფილებელია, თუმცა ტყვეობაშია. მაქსიმალურს ვაკეთებთ იმისთვის, რომ ტყვეობიდან მის გასათავისუფლებლად", - განაცხადა სესიაშვილმა.
ოფიციალური ინფორმაციით, კონგოს დემოკრატიული რესპუბლიკის სამხედრო-საჰაერო ძალების ორი შვეულმფრენი მეამბოხეებმა 27 იანვარს ჩამოაგდეს. ერთ-ერთს საქართველოს მოქალაქე სოსო ოსურაული მართავდა. მეამბოხეებს ტყვედ სწორედ ის ჰყავთ აყვანილი, ხოლო მეორე მოქალაქე დაჭრილია, თუმცა იგი სამშვიდობოზეა და მკურნალობას გადის აღმოსავლეთ კონგოს დემოკრატიული რესპუბლიკის ქალაქ გომაში.
