მიუხედავად დაშინებისა, გაუთქმელობის პირობაზე ხელი არ მომიწერია, ამის შესახებ დეკანოზ გიორგი მამალაძის ადვოკატმა მიხეილ რამიშვილმა პრეზიდენტის განცხადების შეფასებისას დანაცხადა. მისი თქმით, ახლა გამოჩნდება პროკურატურისგან, რამდენად აფასებს პრეზიდენტის რჩევას.
,,თავიდან ბოლომდე ვეთანხმები პრეზიდენტის განცხადებას. გუშინვე განვაცხადე, რომ არაერთი კატეგორიული მოთხოვნისა, გამომძიებლის მხრიდან, რომ მეც გაუთქმელობის პირობაზე მომეწერა ხელი, მე ამაზე უარი განვაცხადე, მიუხედავად იმ დაშინებისა, რომ შეიძლება ჩემს წინააღმდეგ სისხლის სამართლის საქმე აღიძრას. ვუთხარი - ეს თქვენი პრობლემაა, თუ გინდათ დაიწყეთ სისხლის სამართლებრივი დევნათქო და არ მოვუწერე ხელი. დანარჩენი უკვე პროკურატურის გადასაწყვეტია, მოუხსნიან ადვოკატებს ამ ვალდებულებას თუ არა. ჩემმა კოლეგებმა არაერთხელ მიმართეს განცხადებით პროკურატურას, მაგრამ აქამდე პასუხი არ მიუღიათ. ახლა გამოჩნდება პროკურატურისგან, რამდენად აფასებს პრეზიდენტის რჩევას”, - განაცხადა ადვოკატმა.
პრეზიდენტმა პატრიარქთან შეხვედრის შემდეგ განაცხადა, რომ დღეს შეჯიბრობითობისა და უდანაშაულობის პრეზუმფცია დარღვეულია საქართველოში. მისი თქმით, მამა გიორგის და მის ადვოკატებს უნდა მიეცეთ შესაძლებლობა თავისი სიმართლე გააცნონ საზოგადოებას.
