რუსეთის მიერ ოკუპირებულ საქართველოს ოს რეგიონზე საუბრისას ცნობილმა რუსმა ჟურნალისტმა მატვეი განაპოლსკიმ განაცხადა, რომ საჭიროა საქართველოს ხელისუფლებას ჰქონდეს იდეოლოგია ამ მოხლეჩილი ტერიტორიების დაბრუნებისა.
ეს განცხადება რუსმა ჟურნალისტმა დღეს თბილისში სააგენტო "რია ნოვოსტის" საერთაშორისო პრესცენტრში გამართულ პრესკონფერენციაზე ქართველ ჟურნალისტებთან საუბრისას გააკეთა.
მისივე თქმით, როგორც კი საქართველო ეკონომიკურად რუსეთზე მეტად მიმზიდველი გახდება, ამ ორი რეგიონის დაბრუნების საკითხიც წინ წაიწევს და დაახლოებაზე საუბარიც დაიწყება.
ამავე დროს განაპოლსკიმ განაცხადა ისიც, რომ მისთვის ოდნავ ბუნდოვანია თუ რატომ მოითხოვა დამოუკიდებლობა აფხაზეთმა და მით უფრო ე.წ. სამხრეთ ოსეთმა.
"საერთოდ, როდესაც ადამიანი რამეს მოითხოვ ჯერ კარგად უნდა დაფიქრდე გჭირდება თუ არა შენ ეს. ღმერთმა დამიფაროს არც აფხაზებს და არც ოსებს მე შეურაცხყოფას ვერ ვაყენებ. მე უბრალოდ ვმსჯელობ. აფხაზეთში ამჟამად არასტაბილურ სიტუაციაა, არის უმუშევრობა, მართალია მათ შეძლეს და ჩამოაყალიბეს თავიანთი პოლიტიკური ელიტა და ცდილობენ რაღაც გააკეთონ მაგრამ მაინც ადგილზე არიან გაყინულნი, იმიტომ რომ რაც მათ რეალურად სჭირდებათ, ეს არის სავსე პლაჟები ანუ აღორძინებული ეკონომიკა", _ აცხადებს განაპოლსკი და დასძენს, რომ რაც შეეხება ე.წ. სამხრეთ ოსეთს მისთვის საერთოდ გაუგებარია თუ რად უნდოდათ მათ დამოუკიდებლობა.
"რაც შეეხება სამხრეთ ოსეთს მათ რად უნდოდათ დამოუკიდებლობა მე საერთოდ არ მესმის. მგონი ერთადერთი რაც იქ უნდათ არის ის, რომ იქ ირიცხებოდეს თანხები და თან არც არავინ არ კითხულობდეს სად მიდის ეს ფული", _ აცხადებს ჟურნალისტი.
