საქართველოს პრეზიდენტი გიორგი მარგველაშვილი დღეს ბათუმში საკონსტიტუციო სასამართლოს ახალარჩეული მოსამართლის მანანა კობახიძის ფიცის დადების ცერემონიას დაესწრება.
დღესვე საქართველოს პრეზიდენტი, ადმინისტრაციის წარმომადგენლებთან ერთად, კამპანიის „მოითხოვე ქართული“ ფარგლებში, აჭარაში რამდენიმე ქართულ კომპანიას ეწვევა და საწარმოო პროცესში თავად მიიღებს მონაწილეობას.
საპრეზიდენტო კამპანიის ,,მოითხოვე ქართული'' მიზანია ქართული ნაწარმისა და პროდუქციის პოპულარიზაცია, რათა გაძლიერდეს ქვეყნის ეკონომიკა, შეიქმნას სამუშაო ადგილები და დავძლიოთ სავალუტო სირთულეები.
საქართველოს პრეზიდენტმა ქართული პროდუქციის პოპულარიზაციის მიზნით კამპანია „მოითხოვე ქართული“ 12 იანვარს დაიწყო. ამ კამპანიით გიორგი მარგველაშვილი მოძრაობა KAR.GE-ს და ფოტოგრაფ გოგა ჩანადირის ინიციატივას „იყიდე ქართული“ შეუერთდა.
ქართული პროდუქციის პოპულარიზაციის მიზნით დაწყებული კამპანია „მოითხოვე ქართული“ საქართველოს სხვადასხვა რეგიონში გაგრძელდება.