საკრებულოში წარმოდგენილი დოკუმენტაცია არანაირი ეჭვის საფუძველს არ იძლეოდა, - განაცხადა მოსამართლე ნატა ნაზრაიძის ოჯახისთვის ზარალის ანაზღაურებასთან დავშირებით საკრებულოს თავმჯდომარე გიორგი ალიბეგაშვილმა.
,,შემოსული მასალებისა და დოკუმენტაციის საფუძველზე, საკრებულომ მიიღო კანონიერი გადაწყვეტილება, იმოქმედა კანონის ფარგლებში. დოკუმენტაცია, რომელიც იყო შემოტანილი, არანაირი ეჭვის საფუძველს არ იძლეოდა. რაც შეეხება ჩვენი კოლეგების წინადადებას, რომ თავიდან იქნეს განხილული, საკრებულო კოლეგიალური ორგანოა. თუ ისინი თვლიან, რომ მათ მიერ მოპოვებული დოკუმენტაცია განსახილველია, ჩვენ აუცილებლად ვიმსჯელებთ ამ საკითხზე და შესაბამის გადაწყვეტილებას მოგახსენებთ“, - განაცხადა გიორგი ალიბეგაშვილმა.
თბილისის ოპოზიციურმა ფრაქციებმა, ასევე, დამოუკიდებელმა დეპუტატებმა დღეს საკრებულოს მიმართეს 2016 წლის 23 დეკემბრის განკარგულების გაუქმებასთან დაკავშირებით, რომლითაც ნატა ნაზღაიძის ოჯახს სტიქიისაგან მიყენებული ზარალის ერთ მილიონამდე ქონების გადაცემით აუნაზღაურდა. ოპოზიციონერმა დეპუტატებმა საკრებულოში განკარგულების ახალი პროექტი შეიტანეს, რომლის განხილვასაც საკრებულოს უახლოეს სხდომაზე ითხოვენ.
