სააპელაციო სასამართლოს გადაწყვეტილებით დადასტურდა ის, რისთვისაც დაცვის მხარე ორ წელზე მეტი ხნის განმავლობაში იბრძოდა, - განაცხადა ე.წ. კაბელების საქმეზე მსჯავრდებულების ადვოკატმა სოსო ბარათაშვილმა დღევანდელი პროცესის დასრულების შემდეგ. მისივე თქმით, სააპელაციო სასამართლოს დღევანდელ გადაწყვეტილებას საკასაციო წესით გაასაჩივრებენ.
”ჩვენ არ ვიზიარებთ იმ პოზიციას, რომ ამ ადამიანებმა უფლებამოსილება ბოროტად გამოიყენეს. საერთოდ, გაუგებრად მიგვაჩნია, როგორ შეიძლება გამოიყენო თანამდებობრივი უფლებამოსილება ბოროტად ჯგუფურად. ბუნებრივია, ჩვენ ამ გადაწყვეტილებას საკასაციო წესით გავასაჩივრებთ, მაგრამ იმით, რომ ამხელა სასჯელი, რომელიც ტყუილად ჰქონდათ შეფარდებული პირველი ინსტანციის სასამართლოს მიერ, მოიხსნა და გაფლანგვა გაუქმდა, ბუნებრივია, კმაყოფილები ვართ”, - განაცხადა სოსო ბარათაშვილმა.
ე.წ. კაბელების საქმეზე თავდაცვის სამინისტროს 5 ყოფილ მაღალჩინოსანს სააპელაციო სასამართლომ სასჯელის ვადა შეუმცირა, რის შედეგადაც ისინი 2 თვის ვადაში გათავისუფლდებიან.
