მიწისძვრა უმბრიას რეგიონში მდებარე ნორჩას კომუნას სიახლოვეს მოხდა, აღნიშნული კომუნა ჯერ კიდევ რამდენიმე დღის წინ ორმაგი ბიძგების შედეგად ძლიერ დაზარალდა. შეშინებული მოსახლეობა ქუჩაში გამოვიდა. „გარდიანის“ ცნობით, რეგიონის მასშტაბით სამაშველო სამსახურები მუშაობენ და მოსახლეობის მდგომარეობას ამოწმებენ.
„გარდიანის“ რეპორტიორების განმარტებით, მიწისძვრამ მასშტაბური ნგრევა გამოიწვია, ნორჩას გარდა დაზარალდა მარკეს რეგიონში მდებარე არკუატა-დელ-ტრონტოს კომუნაც.
მიწისძვრის ეპიცენტრი ქვეყნის დედაქალაქ რომიდან 132 კილომეტრის დაშორებით იყო, შესაბამისად რყევები აქაც საგრძნობი იყო. ხელისუფლებამ უსაფრთხოების ზომები მიიღო და მეტრო დაკეტა.
საინფორმაციო სააგენტო „როიტერის“ განცხადებით „გარდიანის“ მონაცემებით, მიწისძვრის სიმძლავრე 6,6 მაგნიტუდას შეადგენდა. არსებული ინფორმაციით, იტალიაში მიწისძვრის შედეგად 10 ადამიანი დაშავდა.
