დღეს, საქართველოს განათლებისა და მეცნიერების მინისტრი დიმიტრი შაშკინი და შინაგან საქმეთა სამინისტროს წარმომადგენელი თამარ ბელქანია თბილისის კერძო სკოლას "ცისკარი" ეწვივნენ და სამოქალაქო თავდაცვისა და უსაფრთხოების გაკვეთილს დაესწრნენ.
დიმიტრი შაშკინის განცხადებით იმ ქვეყნის ზოგადსაგანმანათლებლო დაწესებულებებში, რომელიც რეალური საფრთხეების წინაშე დგას, ძალზე მნიშვნელოვანია ისწავლებოდეს სამოქალაქო თავდაცვისა და უსაფრთხოების კურსი და მოზარდები თავდაცვის ელემენტალურ უნარ-ჩვევებს ფლობდნენ.
როგორც ცნობილია, ახალი სასწავლო კურსის დანერგვისთვის ამ სკოლის შესაბამისი კაბინეტი განათლებისა და მეცნიერების სამინისტრომ საჭირო ტექნიკითა და თვალსაჩინოებებით აღჭურვა.
შეგახსენებთ, რომ აღნიშნული პროგრამა პირველ ეტაპზე პილოტირებას რუსთავის, მცხეთისა და თბილისის 15 სკოლაში გადის. ანალოგიური კაბინეტი მცხეთის №2 საჯარო სკოლაში განათლებისა და მეცნიერების მინისტრმა დიმიტრი შაშკინმა თავდაცვის მინისტრთან ბაჩო ახალაისთან ერთად გახსნა. პილოტირების შედეგების ანალიზის შედეგად, სამოქალაქო თავდაცვისა და უსაფრთხოების კურსი საბოლოო სახით ჩამოყალიბდება და ახალი სასწავლო წლიდან სკოლებში სავალდებულო საგანი გახდება.
