12 ოქტომბერს, 10:00 საათზე, PMC კვლევითი ცენტრი, კონრად ადენაუერის ფონდის მხარდაჭერით, ჩაატარებს კვლევის შედეგების პრეზენტაციას და საჯარო განხილვას, თემაზე – “საქართველოში განახლებადი ენერგიის ევროკავშირის დირექტივის გამოწვევებისა და შესაძლებლობების შეფასება”. ღონისძიება ჩატარდება ენერგეტიკის სამინისტროში.
პრეზენტაციას გახსნის ენერგეტიკის მინისტრის მოადგილე მარიამ ვალიშვილი. კვლევის შედეგებს წარადგენს PMC კვლევით ცენტრის კონსულტანტი - ზვიად გაჩეჩილაძე. პრეზენტაციას დაესწრებიან საქართველოს ენერგეტიკისა და წყალმომარაგების მარეგულირებელი ეროვნული კომისიის, საქართველოს სახელმწიფო ელექტროსისტემის (სსე), ელექტროენერგეტიკული ბაზრის ოპერატორის (ესკო) და ელექტროენერგიის გამანაწილებელი კომპანიების წარმომადგენლები.
საქართველომ, 2014 წელს განაცხადი შეიტანა „ევროპის ენერგეტიკული გაერთიანების“ სრულ წევრობაზე. შესაბამისად, ქვეყანას მოეთხოვება დახვეწოს თავისი კანონმდებლობა და ეტაპობრივად მიუახლოვოს იგი ევროპის ენერგეტიკულ კანონმდებლობას.
კვლევის მიზანია, განახლებადი ენერგიის დირექტივის (2009/28/EC) ანალიზი, ასევე საქართველოში მოქმედი ენერგეტიკული კანონმდებლობის შესაბამისობის დადგენა და ხარვეზების იდენტიფიცირება განახლებადი ენერგიის დირექტივის მოთხოვნებთან მიმართებაში.
კვლევა მნიშვნელოვანია განახლებად ენერგიაზე მომუშავე ტექნოლოგიების განვითარებისა და მათში ინვესტიციების სტიმულირებისათვის. ხარვეზების ანალიზი, რომელიც კვლევაშია წარმოდგენილი, სამინისტროს (პოლიტიკის გამტარებელს) შესაძლებლობას მისცემს განსაზღვროს განახლებადი ენერგიის დირექტივის ტრანსპოზიციის ძირითადი გამოწვევები. ასევე, კვლევაში მოცემულია ხარვეზების აღმოფხვრის და დირექტივასთან შესაბამისობაში მოსვლისთვის საჭირო რეკომენდაციები.
კვლევა ჩატარდა PMC კვლევითი ცენტრის მიერ, “პოლიტიკის კვლევა მდგრადი ეკონომიკური განვითარებისთვის„ პროექტის ფარგლებში, კონრად ადენაუერის ფონდის ფინანსური მხარდაჭერით.