ნებისმიერი საჰაერო და სარაკეტო დარტყმა სირიის არმიის მიერ კონტროლირებად ტერიტორიაზე რუსი სამხედრო მოსამსახურეებისთვის საფრთხედ აღიქმება. ამის შესახებ რუსეთის თავდაცვის სამინისტროს წარმომადგენელმა იგორ კონაშენკოვმა განაცხადა.
მისივე თქმით, 17 სექტემბერს დეირ-ეზ-ზორში სირიის არმიის პოზიციების შეცდომით დაბომბვის შემდეგ რუსულმა მხარემ ყველა საჭირო ზომა მიიღო იმისათვის, რომ მსგავსი ინციდენტები აღარ განმეორდეს.
„ეს-400 და ეს-300 ტიპის ანტისარაკეტო სისტემების მოქმედების არიალი ხმეიმიმისა და ტარტუსის ბაზებსაც მოიცავს. ეს ყველა ამოუცნობი ობიექტისთვის ერთგვარი სიურპრიზი იქნება. ჩვენ არ გვექნება დრო ასეთი ობიექტების ამოსაცნობად და მათ განურჩევლად ჩამოვაგდებთ,“-განაცხადა კონაშენკოვმა.
