,,არამხოლოდ მედიასაშუალებები, არამედ პოლიტიკური ძალები, რომლებიც ღიად, პირდაპირ, დაუფარავად ეწევიან რუსეთის ხელისუფლების ინტერესების გატარებას ჩვენს ქვეყანაში”, - განაცხადა ”რესბუბლიკური პარტიის” წევრმა, თამარ კორძაიამ დღეს გამართულ პრესკონფერენციაზე IDFI-ის მიერ მომზადებული პოლიტიკის დოკუმენტს ”კრემლის საინფორმაციო ომი საქართველოს წინააღმდეგ: პროპაგანდასთან ბრძოლის სახელმწიფო პოლიტიკის აუცილებლობა" შეფასებისას.
,,ნინო ბურჯუნაძის პოლიტიკური პარტია პირდაპირ კამპანიას აწარმოებს, საარჩევნო რეკლამაც კი აქვს ოკუპანტი ქვეყნის პრეზიდენტის კადრებით. რა თქმა უნდა, ეს არის საფრთხის შემცველი, იმიტომ, რომ გაჩნდა არამხოლოდ მედიასაშუალებები, არამედ პოლიტიკური ძალები, რომლებიც ღიად, პირდაპირ, დაუფარავად ეწევიან რუსეთის ხელისუფლების ინტერესების გატარებას ჩვენს ქვეყანაში. ამას არც მალავენ და მთელი მათი საარჩევნო კლიპი აგებულია იმაზე, თუ როგორი კარგი და თბილი ურთიერთობა აქვს ნინო ბურჯანაძეს რუსეთის ხელისუფლებასთან. რა თქმა უნდა, ეს არის პრობლემა, მაგრამ ყველაზე მთავარი და მნიშვნელოვანი ის არის, რომ ქართველი ამომრჩეველი, ჩვენი ქვეყნის საზოგადოება არ იზიარებს ამ პათოსს. ამას ადასტურებს არაერთი კვლევა, სადაც ცალსახად, 70 %-ს ქვევით არ ჩამოდის იმ ადამიანთა არჩევანი, რომლებიც თვლიან, რომ საქართველოს საერთაშორისო კურსი უნდა იყოს ევროპული”, - განაცხადა თამარ კორძაიამ.
მისივე თქმით, ეს საკითხები ეროვნული უსაფრთხოების ერთ-ერთი მთავარი სფეროა.
,,ვფიქრობ,რომ კრიზისების მართვის სამსახური უნდა მუშაობდეს სწორედ ინფორმაციული უსაფრთხოების საკითხებზე და ეს უნდა იყო მისი განხილვის ერთ-ერთი თემა”, - აღნიშნა დეპუტატმა.
საქართველოში პრორუსული პროპაგანდა გაძლიერებულია - ამის შესახებ საუბარია IDFI -ის ანგარიშში.
,,ინფორმაციის თავისუფლების განვითარების ინსტიტუტის“ შეფასებით, 2013 წლის შემდეგ რუსული პროპაგანდა გაძლიერდა როგორც მედიაში, ისე პოლიტიკაში. ისინი ამის მიზეზად ხელისუფლების პოლიტიკას ასახლებენ და ამბობენ, რომ მთავრობამ რუსული პროპაგანდის წინააღმდეგ სახელმწიფოებრივი ხედვა უნდა ჩამოაყალიბოს.
როგორც არასამთავრობო ორგანიზაციის ანგარიშშია საუბარი, საზოგადოებაში პრორუსული განწყობის გაძლიერებამ, შესაძლოა პრობლემები შეუქმნას ქვეყნის ევროატლანტიკურ ინტეგრაციას.
