საქართველოს ტურიზმის ეროვნულმა ადმინისტრაციამ ბიუჯეტიდან დამატებით 5,5 მლნ ლარის დაფინანსება მიიღო. როგორც მთავრობის №1589 განკარგულებაშია აღნიშნული, ეკონომიკისა და მდგრადი განვითარების სამინისტროსთვის გამოიყოფა 6 მლნ 219 ათას 200 ლარი, საიდანაც 719 ათას 200 ლარი მესტიის მიმართულებით რეგულარული ავიარეისების საფასურის ნაწილის დაფინანსებას მოხმარდება.
ხოლო დარჩენილი 5,5 მლნ ლარი, სსიპ ტურიზმის ეროვნული ადმინისტრაციის მიერ შემოდგომა/ზამთრის კომპლექსური მარკეტინგული და სარეკლამო კამპანიების წარმოებისათვის დაიხარჯება.
ტურიზმის ეროვნულ ადმინისტრაციაში განმარტავენ, რომ დამატებით გამოყოფილი 5,5 მლნ ლარი 12 ქვეყანაში ინტერნეტ რეკლამის განთავსებისთვისაა გათვალისწინებული.
აღნიშნული დაფინანსების ფარგლებში გათვალისწინებულია ასევე რუსეთში, უკრაინაში, ყაზახეთსა და ბელარუსში გარკვეული ტელექტივობებიც.
ტურიზმის ეროვნული ადმინისტრაციის ინფორმაციით, 2016 წელს ადმინისტრაციამ გაზაფხული/ზაფხულის ონლაინ მარკეტინგული კამპანიისთვის 7,380,900.00 ლარი დახარჯა.
ამ თანხის ფარგლებში ჩატარდა მარკეტინგული ონლაინ კამპანია მსოფლიოს 16 ქვეყანაში. მათ შორის ქუვეითი, კატარი, არაბთა გაერთიანებული საემრიოები, გერმანია, იტალია, ისრაელი, უკრაინა, რუსეთი, პოლონეთი, ბელორუსი, აზერბაიჯანი, ყაზახეთი, თურქეთი, სომხეთი, ლიტვა და ლატვია.
გარდა ამისა, მსოფლიოში ერთ-ერთ ყველაზე პოპულარულ სამოგზაურო პორტალ „Tripadvisor“-ზე ტურიზმის ეროვნული ადმინისტრაციამ ფართომასშტაბიანი სარეკლამო კამპანია დაიწყო. სარეკლამო კამპანია 10 მიზნობრივ ბაზარს მოიცავს: აზერბაიჯანი, გერმანია, ისრაელი, იტალია, პოლონეთი, უკრაინა, თურქეთი, სომხეთი, ყაზახეთი და რუსეთი.
საქართველოს შესახებ სარეკლამო ბანერებს 6 თვის განმავლობაში, ათივე ქვეყანაში, მილიონობით ადამიანი იხილავს. სარეკლამო კამპანია ხელს შეუწყობს საქართველოს ცნობადობის გაზრდას და დამატებით ტურისტული ნაკადების მოზიდვას. გაზაფხული/ზაფხულის მარკეტინგული კამპანია მოიცავდა სატელევიზიო აქტივობებსაც, კერძოდ კი რუსეთის უკრაინისა და ბელორუსის ტელეარხებზე ტურისტული ღირსშენაშნაობების, ინფრასტრუქტურის, ქართული სამზარეულოსა და ბუნების შესახებ გადაცემები მომზადდა.
“ტურიზმის ეროვნულ ადმინისტრაციას შემოდგომა ზამთრის მარკეტინგული კამპანიისთვის გამოეყო დამატებით 5,5 მილიონი ლარი, რომლის ფარგლებშიც განვათავსებთ ინტერნეტ რეკლამას შემდეგ ქვეყნებში: რუსეთი, უკრაინა, ყაზახეთი, არაბთა გაერთიანებული საამიროები, იტალია, გერმანია, თურქეთი, ისრაელი, პოლონეთი, აზერბაიჯანი, სომხეთი, ბელარუსი.
გარდა ამისა, რუსეთში, უკრაინაში, ყაზახეთსა და ბელარუსში ტელექტივობებიც გაქვს დაგეგმილი, კონკრეტულად კი სარეკლამო რგოლის განთავსება წამყვან ტელეარხებზე.
ვფიქრობთ , რომ შემოდგომა/ზამთრის მარკეტინგული კამპანიაც ისეთივე ნაყოფიერი იქნება როგორიც ეს გაზაფხული /ზაფხულის შემთხვევაში იყო. მოგეხსენებათ რომ ტურისტთა დინამიკა კვლავ მზარდია, პირველი 7 თვის მონაცემებიც ადასტურებს, რომ უცხოელი ვიზიტორების უპრეცედენტო რაოდენობა ფიქსიერდება საქართველოში (+17,5 % -იანი ზრდა ტურისტებში). დარწმუნებული ვართ რომ მთლიანად 2016 წელი რეკორდული იქნება ტურისტების რაოდენობის სტატისტიკური მონაცემებით და გაზრდილი შემოსავლების თვალსაზრისით”, აცხადებენ ტურიზმის ეროვნულ ადმინისტრაციაში.
აღსანიშნავია, რომ 2016 წლის ბიუჯეტის მიხედვით ტურიზმის განვითარების ხელსეწყობისთვის ბიუჯეტში გათვალსწინებულია 22,9 მლნ ლარია გათვალისწუინებული.
