აჭარის მთავრობა გმირთა ხეივანში ინფრასტრუქტურის განვითარებისთვის ინვესტორს ეძებს.
რეგიონის ფინანსთა და ეკონომიკის სამინისტრომ აუქციონზე უკვე გამოტანა ტბ. აბუსერიძის ქ. N15/ფიროსმანის ქ. N5-ში მდებარე 3206 კვ.მ არასასოფლო- სამეურნეო დანიშნულების მიწის ნაკვეთი, რომლის საწყისი ღირებულებაც 1 მლნ 170 ათასი ლარია. თავად აუქციონი კი 15 აგვისტოსთვისაა ჩანიშნული.
პირობების მიხედვით, ინვესტორს შესაძლებლობა აქვს არანაკლებ 1800 კვ.მ-დან და არაუმეტეს 2244,2 კვ.მ-მდე ფართობზე მრავალფუნქციური შენობა-ნაგებობა ააშენოს, რომელიც უნდა მოიცავდეს საცხოვრებელ აპარტამენტებს (შეასაძლებელია სასტუმროს, სასტუმროს ტიპის საცხოვრებელი აპარტამენტების განთავსდება) და მიწისქვეშა ავტოსადგომს. ეს უკანასკნელი კი გამოყენებულ უნდა იყოს საზოგადოებრივი და კომერციული დანიშნულებით.
პირობების მიხედვითვე, ინვესტორმა მრავალფუნქციური შენობა-ნაგებობის ექსპლუატაციაში მიღება, ხელშეკრულების გაფორმებიდან 40 თვის ვადაში უნდა მოასწროს.
შენობის ექსპლუატაციაში შეყვანიდან 6 თვის განმავლობაში ნაგებობის ნაწილში, მინიმუმ 800 კვ.მ ფართზე, საზოგადოებრივი, კომერციული და გასართობი ცენტრ(ებ)ი უნდა მოაწყოს.
პროექტის განხორციელებში ინვესტორმა მინიმუმ 8 მლნ დოლარის ინვესტირება უნდა განახორციელოს.
შეგახსენებთ, რომ გმირთა ხეივნის განვითარების კონცეფციაზე აჭარის ფინანსთა და ეკონომიკის სამინისტრომ იმუშავა. ტერიტორიის ფართობია 3 ჰა. დაგეგმარების მიხედვით ხეივანი 14 საინვესტიციო მიწის ნაკვეთად დაიყო, რომლის ათვისება 3 ეტაპად განხორციელდება.
კონცეფციის მიხედვით შენობის მაქსიმალური სიმაღლე 140, ხოლო მინიმალური 30 მეტრი განისაზღვრა. ტერიტორიაზე სასტუმროების, აპარტამენტების, რესტორნების, სხვადასხვა გასართობი ობიექტებისა და სპორტული ცენტრების განთავსება იქნება შესაძლებელი. გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა,სამუშაო ადგილების შექმნა და ქალაქის ინფრასტრუქტურის განვითარებაა.
იმავდროულად, გმირთა ხეივანში 4 ახალი ინვესტიციის განხორციელება უკვე დაიწყო.
