თურქეთის პრეზიდენტის რეჯეპ ტაიპ ერდოღანის განცხადებით, სიკვდილით დასჯის აღდგენის საკითხს მეტი ვეღარ გადაიდება.
სტამბოლში სახელმწიფო გადატრიალების მცდელობის დროს შეტაკებებისას გარდაცვლილთა დაკრძალვის შემდეგ ერდოღანი მხარდამჭერებს შეხვდა. პრეზიდენტს მომხრეებმა სიტყვა რამდენჯერმე შეაწყვეტინეს შეძახილით - “ჩვენ გვინდა სიკვდილით დასჯის აღდგენა”.
“ჩვენ გვესმის თქვენი მოთხოვნა. დემოკრატიულ სახელმწიფოში გადაწყვეტილებებს იღებენ იმაზე დაყრდნობით, რასაც ხალხი ამბობს. ვფიქრობ, ჩვენი მთავრობა მოლაპარაკებებს გამართავს ოპოზიციასთან და გადაწყვეტილებას მიიღებს. ჩვენ ამას მეტი ვეღარ გადავდებთ, რადგან ამ ქვეყანაში ისინი, ვინც იწყებენ სახელმწიფო გადატრიალებას, ამის სანაცვლოდ საფასურს იხდიან”, - განაცხადა ერდოღანმა.
ბოლო სასიკვდილო განაჩენი თურქეთში 1984 წელს აღასრულეს. თურქეთმა სიკვდილით დასჯა 2004 წელს, ევროკავშირის წევრობის მისაღებად ჩატარებული რეფორმების ფარგლებში გააუქმა.
