საარჩევნო და პოლიტიკური პროცესის დროს ძალადობაზე სანქციების გამკაცრების შესახებ კანონპროექტს, რომლის განხილვასაც მთავრობა დაჩქარებული წესით ითხოვს, ”თავისუფალი დემოკრატები” მხარს არ დაუჭერენ. ამის შესახებ შალვა შავგულიძემ პარლამენტის პლენარულ სხდომაზე განაცხადა.
”პროექტით არ არის განსაზღვრული რა ტერიტორიას მოიცავს ”მიმდებარე ტერიტორია”. გადაწყვეტილებას მიიღებს თავად პოლიცია, სად განთავსდეს, რა მოცულობითა და რაოდენობით განთავსდეს. ეს გვაძლევს სურათს, რომ საარჩევნო პერიოდში - არჩევნების დღეს პოლიციას შეუძლია დაიკავოს მთელი ქვეყნის ტერიტორია, განსაკუთრებით საარჩევნო უბნების სიახლოვის ტერიტორია, რაც დემოკრატიულ ქვეყანაში სამართლიანი არჩევნები ჩატარების განცდას არ შექმნის”, - განმარტა შავგულიძემ.
აღნიშნულ კანონპროექტს სავარაუდოდ, არც ,,რესპუბლიკელები“ დაუჭერენ მხარს.
ცნობისათვის, სისხლის სამართლის კოდექსს ემატება ახალი მუხლი, რომლითაც სისხლის სამართლებრივი წესით დაისჯება შემდეგი ქმედებები: საარჩევნო უბანზე ან მის მიმდებარე ტერიტორიაზე, აგიტაციის ადგილას ან მის მიმდებარე ტერიტორიაზე, კამპანიის ადგილას, კამპანიის ღონისძიების ადგილას ან მის მიმდებარე ტერიტორიაზე ცემა ან სხვა სახის ძალადობა ან ამგვარი მუქარა.
„თუკი ასეთ ქმედებას არ მოჰყვა ჯანმრთელობის მსუბუქი დაზიანებაც კი, მაშინ ამგვარ ქმედებაზე ჩვენ ვთავაზობთ პარლამენტს, რომ იყოს თავისუფლების აღვკეთა 2 წლით ვადით. თუ ამგვარ ქმედებას მოჰყვა ჯანმრთელობის დაზიანება - თავისუფლების აღკვეთა 3 წლის ვადით. ხოლო თუ საქმე გვაქვს ჯგუფურ დანაშაულთან, თავისუფლების აღკვეთა 4 წლის ვადით. ასევე მკაცრდება ცემის მუხლი. ჩვენ მივიჩნიეთ, რომ 125-ე მუხლი არის საკმაოდ სუსტი და არ აძლევს არც შინაგან საქმეთა სამინისტროს, არც პროკურატურას, საბოლოო ჯამში, არც მოსამართლეს საშუალებას, რომ ამგვარი ქმედებისადმი უფრო მკაცრი მიდგომა გამოიჩინოს“, - განმარტავს იუსტიციის მინისტრი.
