საქართველოს პრეზიდენტის მრჩევლებმა ტელეკომპანიების წარმომადგენლებთან შეხვედრაზე „საარჩევნო კოდექსში“ შესატანი ის ცვლილებები განიხილეს, რომელიც წინასაარჩევნოდ პოლიტიკური პარტიებისთვის სარეკლამო დროის განაწილების საკითხს ეხება.
პრეზიდენტის მრჩევლის კახა კოჟორიძის განცხადებით, დღევანდელ შეხვედრაზე მყოფმა ყველა მედიის წარმომადგენელმა ცალსახად განაცხადა, რომ მათთვის ეს კანონპროექტი ქმნის პრობლემებს. ასევე, მათ გამოთქვეს გულისტკივილი, რომ დღეს პირველად მიიღეს განხილვაში მონაწილეობა და საქართველოს პარლამენტმა ისე მიიღო კანონპროექტი მეორე მოსმენით და განიხილა მესამე მოსმენით, რომ მათთვის აზრი არ უკითხავთ, რაც ძალიან სამწუხაროა.
კოჟორიძის თქმით, საქართველოს პრეზიდენტის ადმინისტრაცია აღნიშნულ საკითხს სწავლობს და მასზე მუშაობას კვლავ გააგრძელებს.
პრეზიდენტის მრჩევლები საქართველოს პარლამენტს მოუწოდებენ, „საარჩევნო კოდექსში“ შესატან ცვლილებებთან დაკავშირებით, შექმნილი ჩიხური სიტუაციიდან გამოსავალი გამონახოს და მის განხილვაში მედია და პოლიტიკური პარტიებიც ჩართოს, ვისაც აღნიშნული კანონპროექტი პირდაპირ ეხება.
შეხვედრას საქართველოს პრეზიდენტის პოლიტიკური მდივანი ფიქრია ჩიხრაძე, პრეზიდენტის მრჩეველი საზოგადოებასთან ურთიერთობის საკითხებში თინათინ მჟავანაძე, პრეზიდენტის მრჩეველი ადამიანის უფლებებისა და მართლმსაჯულების საკითხებში კახა კოჟორიძე და პრეზიდენტის საპარლამენტო მდივნის მოვალეობის შემსრულებელი ზურაბ მაჭარაძე ესწრებოდნენ.
