დღეს, ‘’თავისუფალი დემოკრატების’’ ლიდერმა ირაკლი ალასანიამ საზოგადოებას პარტიის გუნდის წევრი ლევან სამუშიამ წარუდგინა. ლევან სამუშია არის ადვოკატი სისხლის სამართლის სპეციალიზაციით. გახლავთ საქართველოს ადვოკატთა ასოციაციის წევრი, 2012 წლის საპარლამენტო არჩევნების დროს კოალიცია „ქართული ოცნების“ ზუგდიდის მაჟორიტარი კანდიდატის შტაბის იურისტი. ლევან სამუშია არის ‘’თავისუფალი დემოკრატების’’ ერთ-ერთი დამფუძნებელი.
‘’დიდი წარდგენა ლევან სამუშიას არ სჭირდება. მთელმა საქართველომ იცის ის შრომა, რაც ლევანმა ჯერ კიდევ წინა რეჟიმის დროს, სამართლიანობის აღდგენის ბრძოლაში ჩადო. როდესაც ჩვენ, ოპოზიცია ვიყავით ურთულეს სიტუაციაში, ის სრულიად უანგაროდ გვიწევდა დახმარებას. მასაც ჩემსავით ეგონა რომ უსამართლობა მწვავედ არ იდგებოდა დღისწესრიგში. ვერ წარმოგვედგინა რომ დღეს ერთად მოგვიწევდა ციხიდან უდანაშაულო ადამიანებისათვის გამოხსნისათვის ბრძოლა, მაგრამ ბრძოლა ბოლომდე უნდა მივიყვანოთ. მოხარული ვარ რომ ლევანმა - ამ პარტიის ერთ-ერთმა დამფუძნებელმა მიიღო გადაწყვეტილება და გადადგა კონკრეტული ნაბიჯი პოლიტიკაში მოსასვლელად.ლევანი იქნება ჩვენი ლიდერი დიდუბე 2-ში, ანუ მე-16 საარჩევნო ოლქში. მე დარწმუნებული ვარ, რომ ის ჩვენ პარტიულ სტრუქტურებთან ერთად გამარჯვებას მოიპოვებს“, - განაცხადა ირაკლი ალასანიამ.
‘’ვარ პარტია ‘’თავისუფალი დემოკრატების’’ დამფუძნებელი. მისი დაფუძნების დღიდან აქტიურად ვიყავი ჩართული ჩემი პროფესიული კუთხით, როგორც ადვოკატი წინა რეჟიმის მსხვერპლთა დასაცავად. ასევე, როდესაც კოალიცია ‘’ქართული ოცნება ‘’ შეიქმნა აქტიურად ვმონაწილეობდი უამრავი პოლიტიკური ნიშნით დაკავებული პირების დაცვაში. მიუხედავად ჩემი სიახლოვისა ‘’თავისუფალ დემოკრატებთან’’ და ზოგადად კოალიცია ‘’ქართულ ოცნებასთან’’ არასდროს მიფიქრია გარდა ჩემი პროფესიული საქმიანობისა აქტიურად ჩავრთულიყავი პოლიტიკურ პროცესებში. იმედი მქონდა რომ ახალი ხელისუფლების პირობებში სამართლიანობის და ზოგადად სასამართლო სისტემის გაჯანსაღება მოხდებოდა. თუმცა ეს ასე არ მოხდა. თავს ვალდებულად ვთვლი დავიწყო აქტიური პოლიტიკური ცხოვრება. ჩემთვის დიდი პატივია ვიყო ამ პოლიტიკურ ბრძოლაში ‘’თავისუფალ დემოკრატებთან’’ ერთად და მწამს რომ ჩვენ ერთად შევცვლით ჩვენი ქვეყნის მომავალს უკეთესობისაკენ’’, - განაცხადა ლევან სამუშიამ.
