საქართველო გაეროს ევროპის ეკონომიკური კომისიის (UNECE) „გარემო ევროპისათვის“ მე-8 გარემოსდაცვით მინისტერიალს მასპინძლობს. მინისტრთა კონფერენცია - „ბათუმი 2016“ სასტუმრო „შერატონ ბათუმში” პრემიერ-მინისტრმა გიორგი კვირიკაშვილმა გახსნა.
კონფერენციის ფარგლებში, მედიის წარმომადგენლებისთვის გარემოსა და ბუნებრივი რესურსების დაცვის მინისტრმა გიგლა აგულაშვილმა და გაეროს ევროპის ეკონომიკური კომისიის აღმასრულებელმა მდივანმა ქრისტიან ფრიის ბახმა ერთობლივი პრესკონფერენცია გამართეს.
გიგლა აგულაშვილმა და ქრისტიან ბახმა ხაზი გაუსვეს „გარემო ევროპისათვის“ პროცესის მნიშვნელობას, როგორც უნიკალურ საერთაშორისო პლატფორმას გარემოსდაცვითი გადაწყვეტილებებისთვის. აღინიშნა UNECE-ის როლი, როგორც ეროვნულ ასევე, გლობალურ დონეებზე.
პრესკონფერენციაზე მინისტერიალის ძირითად თემებზე: „მწვანე ეკონომიკის განვითარება პან-ევროპულ რეგიონში“ და „ჰაერის ხარისხის გაუმჯობესება უკეთესი გარემოსა და ადამიანის ჯანმრთელობისთვის“ ისაუბრეს.
ბათუმის მინისტერიალის ფარგლებში საქართველომ 56 ქვეყნის 600-მდე ოფიციალურ დელეგატს გარემოს დაცვისა და განათლების საკითხებზე პასუხისმგებელი მინისტრების, ბიზნეს სექტორის, ბიზნეს ასოციაციებისა და 55 საერთაშორისო ორგანიზაციის მაღალი დონის წარმომადგენლებს უმასპინძლა.
