ჭაბუკთა ნაკრების მოქმედი მწვრთნელი გია იანტბელიძე ადასტურებს, რომ 22 მაისს სოფელ კორცხელში, 53-ე საარჩევნო უბანზე იმყოფებოდა. როგორც იანტბელიძემ ჟურნალისტებს განუცხადა, ის ქართული ოცნების მხარდამჭერია და ზუგდიდში მხარდასაჭერად ჩავიდა, თუმცა როგორც თვითონ ამბობს, დაპირისპირებაში მონაწილეობა არ მიუღია და ძალადობას გმობს.
შეგახსენებთ, რომ კორცხელის დაპირისპირებაში გია იანტბელიძის მონაწილეობის შესახებ "ნაციონალურმა მოძრაობამ" ცოტა ხნის წინ გაასაჯაროვა ინფორმაცია. ირმა ნადირაშვილის ინფორმაციით, ნიკა მელიას და გიგა ბოკერიას ცემაში იანტბელიძე უშუალოდ მონაწილეობდა. "ნაციონალური მოძრაობა" სპორტის სამინისტროს და ჭიდაობის ფედერაციას იანტბელიძის თანამდებობიდან გათავისუფლებას სთხოვს.
