"თავისუფალი დემოკრატები" საქართველოს პრემიერ-მინისტრს ვეტერანების პრობლემებით დაინტერესებისკენ მოუწოდებენ.
დღეს გამართულ პრესკონფერენციაზე პარტიის ლიდერმა ირაკლი ალასანიამ განაცხადა, რომ 2012 წლის დეკემბერში შექმნილი ერთობლივი კომისია, რომელიც ემსახურებოდა ვეტერანთა საქმეების ორგანიზებას და მათი სოციალური დაცვის საკითხებს, არ ფუნქციონირებს.
,,ნებისმიერი სახელმწიფო და ხელისუფლების სახე ფასდება იმითაც, თუ როგორ უვლის ის საკუთარ ვეტერანებს და როგორ აქვს ვეტერანების სოციალური სტატუსი დაცული. ესენი არიან ხალხი, რომელთან უნდა ვუმადლოდეთ იმას, რომ დღეს საქართველო დამოუკიდებელია. ისინი იცავდნენ ტერიტორიულ მთლიანობას მრავალ ომში, რომელიც ჰქონდა ჩვენს ქვეყანას. მე მხვდებიან ვეტერანები, რომლებიც ამბობენ, რომ დღეს მათ დიდი საფრთხე ემუქრებათ, ვინაიდან ვეტერანთა ჰოსპიტალი უკვე სამი თვეა დაფინანსების გარეშე ფუნქციონირებს. ვეტერანებს აქვთ ჯანმრთელობის პრობლემები, ჰოსპიტალის ექიმები უკვე სამი თვეა უხელფასოდ მუშაობენ. ეს რეალურად უმწვავესი პრობლემაა და გული მწყდება, რომ 2012 წლის დეკემბერში შექმნილი ერთობლივი კომისია, რომელიც ემსახურებოდა ვეტერანთა საქმეების ორგანიზებას და მათი სოციალური დაცვის საკითხებს, არ მუშაობს და არ ფუნქციონირებს", - განაცხადა ირაკლი ალასანიამ.
მისივე თქმით, ხელისუფლებას ვეტერანთა მიმართ არანაირი პოლიტიკა არ აქვს. შესაბამისად იგი მოუწოდებს კონკრეტული უწყების ხელმძღვანელებსა და მთავრობის მეთაურს დაინტერესდეს ვეტერანთა პრობლემებით.
