განათლებისა და მეცნიერების სამინისტროს მითითებით თსუ-მა ბათილად უნდა ცნოს ოქმი, რომლის თანახმადაც, თსუ-ის აკადემიურმა საბჭომ ადმინისტრაციის ხელმძღვანელის თანამდებობაზე წარსადგენად გიორგი გაფრინდაშვილის კანდიდატურის შერჩევის გადაწყვეტილება მიიღო. აღნიშნული ოქმის საფუძველზე, მას შემდეგ, რაც იოსებ არჩვაძემ კანდიდატურა მოხსნა, კანცლერის ახალი კონკურსი კი არ გამოცხადდა, არამედ კანცლერობის კანდიდატი ძველი კონკურსის ფარგლებში დარჩენილი კანდიდატებისგან შეირჩა.
აღნიშნული დასკვნა განათლებისა და მეცნიერების სამინისტროს შიდა აუდიტმა თსუ-ის ინსპექტირების შედეგებზე დაყრდნობით მიიღო და უნივერსიტეტს 16 მარტს გადაეგზავნა.
განათლების მეცნიერების მინისტრი აცხადებს, რომ ახლა, აკადემიური საბჭო რექტორის, ლადო პაპავას საკითხის განხილვას გვერდს ვერ აუვლის. მისივე თქმით, ახლა ყველაზე მნიშვნელოვანია, აკადემიურმა საბჭომ თავისი ფუნქცია ძალიან კარგად შეასრულოს.
,,ვფიქრობ, ახლა ყველაზე მნიშვნელოვანია აკადემიურმა საბჭომ თავისი ფუნქცია ძალიან კარგად შეასრულოს. განიხილოს ყველა ძალიან მნიშვნელოვანი დეტალი, რადგან მართლა არ იყო უნივერსიტეტში კარგი მდგომარეობა. თუ დაგვავიწყდება გუშინ და გუშინწინ რა ხდებოდა, ეს იქნება ძალიან ცუდი. პირდაპირ ვამბობ, ამას მხარს ნამდვილად ვერ დავუჭერთ", - განაცხადა თამარ სანიკიძემ.
მინისტრი მიუღებლად მიიჩნევს სტუდენტთა ნაწილის მიერ პრობლემების მოგვარებისთვის ვადის 16 აპრილამდე განსაზღვრას. მისი თქმით, ასე პრობლემები მხოლოდ ნაწილობრივ მოგვარდება.
