,,ნაციონალური მოძრაობის“ საგარეო ურთიერთობათა მდივანი გიგა ბოკერია მიიჩნევს, რომ სახელმწიფო უსაფრთხოების სამასახური ,,ებრძვის პროდასავლურ ოპოზიციას”. პრემიერ-მინისტრის დღევანდელი განცხადების შეფასებისას მან ასევე განაცხადა, რომ სუს-ი არის გაუარესებული კუდ-ი და არჩევნების შემდეგ იგი გაუქმდება.
"როგორც მოსალოდნელი იყო, ნაციონალური მოძრაობის ინიციატივის საპასუხოდ სუსი გაუქმების თაობაზე, ივანიშვილის გუნდი, პრემიერ -მინისტრი კვირიკაშვილი, გადაეფარნენ სუს, იგივე კუდს, გაუარესებულ კუდს და ახლა გვეუბნებიან აბსოლუტურად უტიფრად, რომ თურმე სუსი გაუქმება და კრიტიკაც კი ასუსტებს ჩვენს უსაფრთხოებას. სუსი ერთადერთ რამეს აკეთებს, უთვალთვალებს საკუთარ საზოგადოებას, ებრძვის პროდასავლურ ოპოზიციას და დაკავებულია შანტაჟით, ამიტომ სუსი, გაუარესებული კუდი აუცილებლად გაუქმდება ივანიშვილის ოქტომბრის არჩევნებში დამარცხების შემდეგ“, - განაცხადა გიგა ბოკერიამ.
საქართველოს პრემიერ–მინისტრმა მთავრობის სხდომაზე განაცხადა, რომ ქვეყნის უსაფრთხოების დისკრედიტაციის მიზნით გამოთქმული თითოეული სიტყვა ასუსტებს ჩვენს სახელმწიფოს. გიორგი კვირიკაშვილი ბოლო დროს ქვეყნის უსაფრთხოების სისტემასა და ინსტიტუტებზე გამოთქმულ ბრალდებებს გამოეხმაურა და მას პოლიტიკური სპეკულაციები უწოდა. პრემიერმა მოუწოდა პოლიტიკოსებს, გააცნობიერონ ქვეყნის წინაშე მდგარი გამოწვევები.
„მინდა ჩვენს ოპონენტებს შევახსენო, რომ სწორედ ჩვენი მთავრობის პირობებში დაიწყო უმნიშვნელოვანესი რეფორმები შს სამინისტროში, უსაფრთხოების სამსახურში, პროკურატურაში. სწორედ ამ რეფორმების და ამ ინსტიტუტების უშუალო მონაწილეობით განხორციელდა ძირეული ცვლილებები, რამაც დემოკრატიის უფრო მაღალი ხარისხი მოიტანა ჩვენს ქვეყანაში. მინდა, კიდევ ერთხელ მოვუწოდო ყველას, რომ თითოეული სიტყვა გამოთქმული ამ ინსტიტუციების დისკრედიტაციის კუთხით, ასუსტებს ჩვენს სახელმწიფოს. ის რომ რეფორმები არ დასრულებულა და ეს ინსტიტუციები კვლავაც საჭიროებენ რეფორმებს, არავითარ შემთხვევაში არ გულისხმობს იმას, რომ აგდებით ვისაუბროთ მათზე. ჩვენ გვაქვს მნიშვნელოვანი გამოწვევები და გავაცნობიეროთ, რომ ეს დისკრედიტაცია პირველ რიგში ასუსტებს სახელმწიფოს,“–აღნიშნა პრემიერმა.
