შეერთებული შტატების სახელმწიფო მდივნის ჰილარი კლინტონის განცხადებით, აშშ-სა და რუსეთს შორის ნდობის პროცესი, რომელიც საქართველოში 2008 წლის აგვისტოში განვითარებული მოვლენების გამო გაუარესდა, აღდგენის სტადიაშია.
ამის შესახებ კლინტონმა სენატში გამოსვლისას განაცხადა, სადაც მან სენატორებს აშშ-სა და რუსეთს შორის გაფორმებული სტრატეგიული შეიარაღების შემცირების ხელშეკრულების თაობაზე მიაწოდა დეტალური ინფორმაცია.
"ნატოში ჩვენი მოკავშირეები მიესალმნენ ამ შეთანხმებას. ისტორიულად სწორედ ისინი არიან ფრონტის ხაზზე. განსაკუთრებით ცენტრალურ და აღმოსავლეთ ევროპაში, რომელიც კმაყოფილები დარჩნენ, როცა შეერთებულ შტატებსა და რუსეთს შორის თანამშრომლობამ ამ დონეს მიაღწია. ეს საფუძველია, რომ გავაგრძელოთ სტრატეგიულ დოკუმენტზე მუშაობა, რომელიც ნატოს მომავალ როლსაც ასახავს. არსებობს ნატო-რუსეთის საბჭო. მიმდინარეობს ნდობის აღდგენის პროცესიც, რომელიც საქართველოში ბოლოდროინდელი, ძალიან სამწუხარო მოვლენების დროს გაუარესდა და რამაც გაუმძაფრა ჩვენს მოკავშირეებს იმის მოლოდინი, რომ ჩვენ მათი დაცვა მომავალშიც უნდა განვაგრძოთ", - განაცხადა კლინტონმა.
