თბილისის საქალაქო სასამართლოს ყოფილი თავმჯდომარის მამუკა ახვლედიანის განცხადებით, მისი გათავისუფლება პირად შურისძიებას უკავშირდება. „ქრონიკასთან“ საუბარში მან ასევე განაცხადა, რომ მოამზადებს სარჩელს და დანებებას არ აპირებს.
„ეს არის პირადი შურისძიება, როგორც უზენაესი სასამართლოს თავმჯდომარის, ასევე, საბჭოს და საბჭოს მდივნის მხრიდან. ეს არის პირდაპირი დევნა, რადგან რა საკითხებზეც საუბრობენ, ეს იყო მოსამართლეების მოთხოვნით და პირდაპირი კანონით მონიჭებული უფლებით განვახორციელე ეს საკითხი. ეს არის აბსურდული აზრი, რასაც აყალიბებენ. მე რა თქმა უნდა, ვაპირებ გასაჩივრებას. ამ საკითხებს გავდივარ. ეს ასე არ დამთავრდება. დანებებას ნამდვილად არ ვაპირებ“, - განაცხადა ახვლედიანმა. იგი აღნიშნულ საკითხზე ხვალ პრესკონფერენციას გეგმავს
იუსტიციის უმაღლესმა საბჭომ თბილისის საქალაქო სასამართლოს თავმჯდომარე მამუკა ახვლედიანი თანამდებობიდან დღეს გაათავისუფლა. ამ გადაწყვეტილებას საბჭოს პრეზიდენტის კვოტით არჩეული ვახტანგ მჭედლიშვილის გარდა ყველამ დაუჭირა მხარი. თბილისის საქალაქო სასამართლოს თავმჯდომარის მოვალეობის შემსრულებლად გიორგი ებანოიძე დაინიშნა.
